Nongpoh, Jylliew 29: Ban thaw lad thaw lynti na ka bynta ki khun samla kiba ym donkam don jam bad shi bynta kum kawei na ka lad ban ioh kam ioh jam, ka Aibid Maring Memorial Training Centre ka la pynlong da ka jingai jinghikai kaba 2 bnai kynthih ïa ki khun samla kiba ym donkam ban siew pisa halor ka kam suh jaiñ (Tailoring) khnang ba kan long ka lad ioh kam ioh jam ïa ki khun sala kiba ym donkam don jam.
Ïa kane ka prokram ai jinghikai ba ar bnai kyntih la plie paidbah naduh ka 25 tarik u Jylliew 2022 da ka Kong Marian Maring, kaba dei ka BJP state Secretary kum ka kongsan bad la sakhi lang ruh da ka jingdon lang u P.S Toor, uba dei u Vice President ka BJP Kissan Morcha ha ka jylla, ka Sukh Toor, kaba dei ka Centre Manager ryngkat ki khun samla na ka dong bad ka thaiñ Ri Bhoi.
Ïa kane ka jingai jinghikai la pynlong ha Gladden Tower Nongpoh bad la kyrshan lyngba ka Skill Root kaba dei hapoh ka jingpeit jingkhmih ka NSDC lyngba ka skhim ba la tip kyrteng kum ka Parivartan ba la beit tyngka lyngba ka HDFC Bank.
Ïa kane ka prokram ai jinghikai hallor ka kam suh jaiñ la shim bynta lang ruh ym tang ki kynthei hynrei la don ruh ki shynrang kiba la shim bynta ban ioh ïa ka jinghikai pyntbit halor ka kam suh jaiñ.
Haba kren ha kane ka sngi kum ka kongsan, ka Kong Marian Maring ka la ai khublei kyrpang ïa ka Skill Root kaba la shim khia ban pynlong ïa kane ka prokram ai jinghikai bad kumjuh ruh ïa ka Aibida Maring Memorial Training Centre ba bun ki khun samla ki la ioh ka lad ka lynti ban wan pyntbit ha ka kam suh jaiñ.
Ka Kong Marian Maring ka la pynshlur ruh ïa ki khun samla ba ki dei ban long kiba shlur bad kiba shim khia lada wan kino kino ki lad ki lynti ba kin lah ban thaw lad na ka bynta ka kam ka jam, namar ha kine ki sngi ba bun ki samla kim donkam don jam lada ki la pyntbit shisha kan long ruh ka lad ioh kam ioh jam.
Shuh shuh, ka la bynrap ruh da kaba ong ba ha kine ki sngi bun ki samla kiba la pyndep ïa ki kyrdan pule bapher bapher bad ki hap ban shu shong ha la ing na ka daw ka jingkyrduhh kam kyrduh jam, hynrei lada don kum kine ki lad ai jinghikai ki samla ki dei ban shim kabu namar kano kano ka kam kaba ngi trei ka dei kaba kordor bad kaba ngi lah ban pyndap jakpoh ïa lade, ka la bynrap.
