Tura, Jymmang 29 : Ka District Commerce and Industries Centre (DCIC) Tura ka la ïarap lyngba ka skhim Prime Minister Employment Generation Programme (PMEGP) ïa ka samla Rikamatchi D Shira ba kan seng ïa ka Studio pynbha briew naduh u sniuh haduh ka sniehdoh kaba la tip kum ka M/s Studio Metamorph ha Sora Complex, Tura.
Kane ka samla Rikamatchi ka la pynpaw ruh ba kane ka studio jongka ka dei ruh ka thong ka ban pynneh pynsah ïa ka mariang bad ka la ïateh paralok ruh bad ka kompani Casmara & Naturica khnang ban pynlong ïa kane ka studio kaba lah ban shakri hok ïa ki paidbah.
Ka PMEGP ka dei ka skhim jongka sorkar pdeng bad na kane ka skhim kiba ïoh ïa ka kin ïoh ka subsidy kaba haduh 35 % na ka jingmang jongka projek bad ka jingïarap kan wan lyngba ka DCIC. Lyngba kane ka skhim kin don bun ki samla ki ban ïoh jingmyntoi bad lah ban ïeng ha la ki jong ki kjat.
Na ka liang u DC ka West Garo Hills u Sapnil Tembe u la kyntu ïa ki samla ba kin shim ïa kane ka kabu ban seng kam lyngba kane ka skhim PMEGP namar kan ym ïarap tang ba kin lah ban ïeng ha la ki jong ki kjat hynrei kan ïarap ruh ban aikam ai jam ïa kiwei kumba la leh da kane ka samla Rikamatchi bad na ka liang u DC u kitbok ïa kane ka samla ba kan lah ban pynïaid shakhmat ïa kane ka kam.
