Lyngba ka skhim CSR ai jingkyrshan ka DBF 60 ngut ki samla ka EJH District ban ïoh kam ïoh jam

Shillong, Nailar 08: Ki jingpyrshang jong ka Dalmia Bharat Foundation (DBF), kaba dei ka tnat CSR jong ka Dalmia Bharat Ltd. (DBL), ban ai ki jinghikai kiba lah ban pynïoh kam ïoh jam ïa ki samla, ka lah seisoh lyngba ki DIKSHa ki jaka hikai kiba don ha Jaintia Eastern College, Khliehriat bad haThangskai. Ha kane ka bynta kumba 60 ngut ki samla ha ki bun bah ki lad ai kam ai jam.
Ki samla kiba shah pyntbit na bynta ka 2025–26, ki samla kiba lah pyntbit ha ki kam Assistant Electrician ha Thangskai bad ka Beauty Care ha Khliehriat ki lah ïoh ïa ki sertiphiket jong ki. Hadien kata, la bud da ki jingïalang ban kyrshan ha kaba lah don ki jaka kiba lah ban ai kam ai jam ïa ki.
Ha ka jingkren jong u, u Padmanav Chakravorty, Regional Manufacturing Head, North East, Dalmia Cement (Bharat) Limited, u ong, “Ka long kaei kaei kaba itynnad ban sakhi ïa ka jingshim bynta ba shitrhem jong kine ki DIKSHa ha Meghalaya. Ngi khmih lynti ban nanglah ban pynkupbor shuh shuh ïa ki samla ha ki bnai ban wan bad ban kyrshan ïa ka jingïaid lynti jong ki ha kaban ïoh ki kam ba biang.”
Ki nongshah hikai ki la pynpaw ïa ka jingsngewtynnad jong ki. Justness Dkhar, ba leh ïa ka Beauty Care , la ong, “Nga la ïoh ïa ka jingshaniah, ka jingnang jingstad, bad ka jingshemphang na kane ka jinghikai . Nga lah ïoh ka Nongrim kaba biang na kane ka jinghikai.Nga ai khublei ïa ka Dalmia Bharat Foundation bad Jaintia Eastern College kaba la ai ïa ngi ïa kane kabu.”
I Estar Swer, iba dei na kiwei ki ba ïoh ïa ka jinghikai, i ong, “Ban don bynta ha ka ne ka jingshah hikai ka dei ka rai kaba biang tam jong nga. Nga ïoh ka jingnang ha ka kam pynbha briew (beauty care skills) bad ha kajuh ka por, ka lah pynlong ïanga ban long adkar, ban nang ban pynbiang ïa ka por, bad kumjuh ruh ban nang ban kren bad kiwei. Nga sngew sarong bad nga don ka jingkyrmen ïa ka lashai.”
Ki jingïalang ki la sakhi ïa ka jingïashim bynta na ki bor synshar shnong bad ki paralok jong ki tnad treikam. Ha Khliehriat la pynlong ïa ka jingsam syrnod ha ka jingïadon lang u Manish Kumar, IAS, SDO .
Ha ka jingïalang ha Thangskai la ïohi ïa ka jingïashim bynta da ka kong Diewipaia Tongper, MDC ka JHADC; U bah Phervision Nongtdu, u Principal, Jaintia Eastern College; bad u Amlanjit Das uba dei u nongpynïaid ïa ka projek jong ka CII Foundation.
Ka DIKSHa ka dei ka bynta kaba kham jylliew jong ka DBF ban ai lad ïa ki briew ba kin ïoh jinghikai bad ki lad kamai kiba biang. Ka prokram ka ai bor ïa ki samla ban noh synniang sha ka ïoh ka kot. ïa ki jaka pule jong ka DIKSHa la thaw ha kata ka rukom ba lah ban pynkiew ïa ki jingdonkam ki briew katei ka thaiñ.