Shillong, Nailar 02: Ka Meghalaya State Price Monitoring & Resource Unit (MSPMRU) ka la lah ban pyndep ïa ka Seminar kaba shi sngi halor ki kyndon ban pynbeit ïa ki dor jong ki dawai dashin da ka NPPA bad ka jingwanrah ïa ka Pharma Sahi Daam na ka bynta ki pharmacist, ki trai dukan kiba die khutia bad kiba dielang jong ka Eastern West Khasi Hills District ha ka jingïalang kaba la long ha ka New Conference Hall, Tirot Sing Memorial Hospital.
Ki kynrem ki lyndan kiba la don ha kane ka sngi ki long u Bah M. Diengdoh, MCS, Addl Deputy Commissioner, u Bah P.S Marwein District Superintendent of Police, Dr T. Lyngdoh Medical Superintendent Tirot Sing Memorial Civil Hospital Mairang, u Bah M. Siangshai, Project Coordinator of MSPMRU bad kiwei kiwei.
Ka jingthmu ba kongsan eh jong kane ka seminar ka long ban hikai ïa ki pharmacist bad kiba die dawai khutia na kylleng jong ka district shaphang ki kyndon jong ka sorkar kiba ïadei bad ka maximum retail price ( MRP) na ka bynta ki dawai, ban pynthikna ba ki kompeni shna dawai bad kiba die khutia kim dei ban kyntiew ne pynheh ïa ka dor ki dawai.
Ha kane ka sngi ka la don ruh ka jingpyni ïa ki slide presentation kiba ïathuh ïa ki jingthmu jong ka NPPA kaba trei ïa ka kam kaba kongsan ban pynthikna ïa ka jingdon bad ka jinglah ban ïoh ïa ki dawai ha ka dor kaba bit bad kaba lah ban thied da baroh.
Ki rynsan ka Pharma Sahi Daam bad Pharma Jan Samadhan ki dei kiba la pynïaid da ka NPPA na ka bynta ban ai ki jingtip shaphang ki dor jong ki dawai bad ban shim ruh ïa ki jingpynpaw jingeh jong ki paidbah. Ha ka seminar la pyni ruh ïa ka jingpynwandur ïa ka Pharma Sahi Daam App, kaba la shna ban kyntiew ïa ka jingtreikam kaba khuid, kaba shai bad kaba biang ha kaba ïadei bad ka pharmaceutical sector. Kane ka App ka thmu ban pynlah ïa ki paidbah ban peit ïa ki dor jong ki dawai bad ban phah ruh ki jingujor lada ki dukan die dawai ki shim palat ïa ka dor kaba la buh.
U Bah M. Diengdoh, Addl Deputy Commissioner u la ïathuh ïa ki jingtreikam ba khlem shong thait jong ka district ban peitngor ïa ki rukom treikam ki pharmacy. U la banjur ba ka jingleit jurip ba manla ka por da ka kynhun ka tnat ka koit ka khiah ka long ban pynthikna ba kan dei ban don ka jingbud ïa ki kyndon bad ban ai ki jingshakri ba ïadei bad ka koit ka khiah, naba kum kine ki jingjurip ki long kiba donkam ban ïada ïa ka koit ka khiah ki paidbah bad ban pynlah sumar kham kloi ïa ki jait jingpang.
U la banjur shuh shuh ba baroh kiba don bynta ha ka pharmaceutical sector ki dei ban bud pyrkhing ïa ki kyndon aiñ ban pynthikna ïa ka jingai jingsumar kaba bha bad ka jingdonkam ban leh khuid ïa kane ka district ba dang shu plie thymmai.
Katba u Bah P.S Marwein, DSP ha ka jingkren, u la pynpaw ka jingsngewkhia halor ka jingïai kiew ki briew kiba la shah ktah bad kiba pyndonkam bakla ïa u drok. U la kyntu ïa ki trai pharmacy bad kiba die dawai khutia ban long kiba husiar, khamtam ha ka por ba ki die ïa ki tiar kum ki syringe ne kiwei ki dawai kiba lah ban pyndonkam bakla. U la khot ïa ka jingdonkam ban long kiba husiar khamtam ban ïada na kum kine ki jait jingdih ba kin ngat ha ki kti ki bym dei.
Ha kane ka seminar la wan ban ïashim bynta da ki riewshemphang ka koit ka khiah, ki pharmacy, ki trai dukan, kiba die khutia bad kiba dielang.
