Shillong, Nailar, 02: Ka Hynñiewtrep National Youth Front (HNYF) West Jaiñtia Zone ha ka sngi Baar ka la kynnoh ba ka ophis jong u District Medical & Health Officer (DM&HO) ka West Jaiñtia Hills District ka la thungkam ha ki 19 tylli ki post kiba thylli khlem da bud ïa ki kyndon treikam jong ka Sorkar Jylla.
Ha ka jingïakren bad ki lad pathai khubor, u President ka HNYF-West Jaiñtia Zone u Bah Howniwat Sutong u la ïathuh ba ka seng ka la lap ïa kane lyngba ka jubab RTI ba la ïoh pdiang na ka Ophis jong u DMHO ka West Jaiñtia Hills District dang shen.
U la ong ruh ba kane ka jingthungkam khlem da bud ïa ki kyndon thungkam jong ka Sorkar ka long kaba be-aiñ namarba kine kiba la shah thungkam kim dei satia kiba la pas ïa ka eksamin ba la pynlong da ka District Selection Committee (DSC) bad ong ruh ba kane ka jingthungkam ka dei kaba la leh da ka jingïatip lang jong ki ophisar ruh ym pat lah ban tip.
Katkum ka jingïathuh jong une u nongïalam ka HNYF-West Jaiñtia Zone kine ki 19 ngut ki dei kiba la shah thungkam naduh u snem 2014. “Ka jingkylli ka long lada donkam kyrkieh balei ym thung shuwa kiba don ha ka lynti bad ïa kiba dang ap (waiting list) ban shah thungkam kiba la don kyrteng ha District Selection Committee (DSC),” ong u Bah Sutong.
Ka seng ka la aiti ruh da ka jingthoh sha u Director of Health Services (DHS) da kaba dawa ba dei ban weng kam noh mardor ïa u DM&HO ka West Jaiñtia Hills District hynrei lym kumta ka seng kam banse ban leit mudui sha ki bor kiba kham halor lane wat sha ka Iingbishar.
