Lyngba ka RTI lap ïa ka jingbamsap na ka skhim jong ka Soil ha Mawkynrew Block

Shillong, Jylliew 06: Ka jingbamsap kaba palat 13 lak tyngha kine ki shiphew snem tam, ka la paw pyrthei mynta kasngi na ka Shnong Nongpyrdi kaba hapoh ka Mawkynrew C&RD Block.
Kane ka long lyngba ka jingwan pynshai paidbah da ki nongshong shnong pyrshah ïa u Rangbah Shnong katei ka shnong u Master Nongrum da kaba kynnoh ba u la bam lut ïa ka pisa jong ka scheme Integrated Watershed Management Program (IWMP), ka skhim rep bad kiwei de ki jingïarap ba la bei ban pyntreikam naduh u 2011 haduh u snem 2020.
Katkum ka jingtip kaba ki la ïoh lyngba ka RTI, ki rangbah jong katei ka shnong ki la ong ba une u rangbah shnong barim u la pynrung kyrteng ïa ki khun jong u kiba dang rit ka rta bad kiba dang ha ka rta ba 10 snem, 11 snem bad 13 snem ban long kum ki nongïoh myntoi na kane ka skhim.
Haba kren sha ki lad pathai khubor u president ka HNYM bah Louis Dohtdong uba la ïarap ïa ki nongshong shnong ban pan jingtip lyngba ka RTI u la ïathuh ba ka shnong hi ha kaba sdang ka la phah shuwa da ka jingthoh sha ka ophis ka Soil and Water Conservation ban pynshai halor ka jingpyntreikam ïa ki scheme, hynrei na ka liang ka ophis ka la sngap mynthi khlem ai jingpynshai satia sha ki nongshong shnong.
U Bah Louis u la ïathuh ba dei tad ynda la ïoh ïa ka jingtip lyngba ka RTI na ka soil & water conservation department, ba ki paidbah nongshong shnong ki la lap ba ka ophis ka la pynlait pisa sha une u briew katba sha ki kiba dei hok ban ïoh jingmyntoi kam poi satia.
Shuh shuh u Bah Louis u la ong ba katkum ka RTI la lap ba baroh ki scheme kiba la mang naduh u snem 2011 haduh 2020 la pynpoi beit sha u rangbah shnong barim ka Nongpyrdi.
Haba bynrap lang ïa kane uwei na ki na ki nongshong shnong jong katei ka shnong u Bah Thrip Mynsong la ong ba ka jingleh jong une Rangbah Shnong barim ki la sah ha ka umdum ban tip ba ka sorkar ka la pynlait pisa sha ki katba na ki pat kim pat ïoh pdiang satia ïa ka pisa kat haduh mynta ruh..
Shuh shuh u la ong ba katkum ka RTI la shem ba ha u snem 2012-13 ka IWMP ka la phah pisa haduh 2 lak tyngka sha u rangbah shnong ban pyntrei ïa ka dam hynrei haduh mynta ym don satia kino kino ki dak ba la pyntrei ïa kane ka projek katba ïa ka pisa pat la dep pynlait sha une u Rangbah Shnong barim.
Shuh shuh u la kynnoh ba katkum ka RTI, ha u 2018 ka Integrated Watershed Management Program (IWMP) ka la bei 5 lak tyngka sha 34 ngut ki nongïoh myntoi hynrei ym don satia mano mano ba ïoh pdiang ïa kane ka pisa lait tang kiba ha ïing jong une u Rangbah Shnong barim.
Shuh shuh u la ong ba naduh u 2011 haduh 2020 u rangbah shnong ka Nongpyrdi u la ïoh ïa ka mang tyngka kaba haduh 13,53,036 lyngba ka IWMP bad ka soil and water conservation department katba ka jingtrei pat kam don satia.
Shuh shuh u Bah Louis u la buh jingkylli ïa ka ophis kaba la pynlait ïa ka pisa khlem da jurip ban pynthikna ba ki skhim kiba la mang kin pyntreikam hok kat kum ki kyndon bad ki jingthmu ba ki la mang.
Shuh shuh u la dawa ba une u Rangbah Shnong barim u dei ban pynphai mar mar ïa baroh ka pisa lem kumta na ka liang jong ki kin ujor da ka ejahar pyrshah ïa une u briew.