Lyngba ka RTI 48 tylli ki tnad trei kam jong ka sorkar ki la jubab ia u bah RS Sohlang

Nongstoiñ, Nailar 02 : Ha kaba ïadei bad ka jingpyndon kam ban wad jingtip lyngba ka RTI u nongthohkhubor jong u Mawphor u la ïoh ban ïakren sani bad u bah Syrpailin Sohlang sordar barim ka shnong Markasa ha kaba u la ïathuh ba naduh ba ka sorkar pdeng ka la mynjur ban pynlong aiñ ïa ka hok wad jingtip ha u snem 2005, ha u 2006 u la sdang ban pyndon kam ïa katei ka aiñ u la leit ban ïa u Information Commissioner bad hadien ba u la ïoh jingshai kumno ban applai bad ban wad jingtip kat kum ki kyndon jong katei ka aiñ u la pyrshang bad katei ka jingpyrshang jong u ka la long kaba sei soh.
Nalor kata u la ïathuh ruh ba naduh ba u la sdang ban pyndon kam ïa katei ka aiñ haduh mynta haduh sawphewphra tylli ki applikeshon u la dep aplai lyngba ka hok wad jingtip na ki tnad trei kam bapher bapher halor kiba bun ki skhim bad katno jait ki don bad u la ïoh ïa ki jubab kiba shai bha na ki Public Information Officer jong ki tnad trei kam jong ka sorkar.
U bah Sohlang u la ong ruh ba ka jingpyrshang jong u ban ïoh ïa ki jingtip kiba shai bad kiba thikna ha kaba ïadei bad ka jingdon jong ki skhim sorkar bad ka jingpyntrei kam ïa ki kam shym mut ba ynda u la ïoh un ai da ka mokutduma halor ka jingbym pyntrei kam hok ïa ki skhim sha ki paitbah hynrei ka jingkwah jong u ka long tang ba un tip bad lada ki paitbah ki kylli un lah ban jubab da kaba pynshisha lyngba ki jingthoh ba u la ïoh na ki ophisar.
Ha kajuh ka por u la ong ba ka jingkwah jong u ka long ba lada don ki ba kwah ban wad jingtip un pynshai ïa ki kumno ba kin leh namar lada shu leit pan RTI khlem da bud ryntih ïa ki kyndon ba la buh da ka sorkar kin ophisar kin ym ai jubab satia. Nalor kata u la ong ruh ba ha kine ki sngi ki don shibun bah ki samla kiba la nang la stad hynrei kim tip satia kiei ki jait skhim kiba ka sorkar ka la mang kyrpang na ka bynta ki paitbah kumta lada ki kwah ban tip kan ym don jingeh ba kin ïoh lada ki applai lyngba ka hok wad jingtip bad kan long ruh ka jingmyntoi kaba khraw ïa ki ba kin pynshai sha ki paitbah kat kum ki jingshisha.
Nalor kata lada baroh ki samla kiba la nang la stad ki sngewkhia ha kaba ïadei bad ka jingsahdien jong ka jylla khamtam eh ka jingbym pyntrei kam hok jong ka sorkar ïa ki skhim ha ki nongkyndong kan pynsgewthuh ïa ki paitbah kumno ba kin leit pynsngew ïa ka jingdon kam jong ki sha ki heh sorkar.
U la ong ruh ba wat la u dang pule tang klass I hynrei ka jingpynlong aiñ jong ka sorkar ïa katei ka hok wad jingtip ka dei ka kabu kaba khraw ïa kiba kwah ban tip ïa ki jingshisha.Utei u rangbah u la ong ruh ba ha kine ki sngi bun ki paitbah nongshong shnong ki shah ïalam bakla ha ki riew kwah burom kiba shu kynnoh pathar madei mata ba ki ophisar bad ka sorkar ki la bam klop bad pyndon kam bakla ïa ka pisa paitbah khlem kino kino ki jingpynshisha da ki jingthoh kiba ki la pan jingshai lyngba ka hok wad jingtip bad kitei ki jingkynnoh kim long kiba khlem nongrim suda namar lada ki kwah ban tip ïa ki jingshisha ki dei ban da pan jingshai da ka lynti kaba dei khnang ba ki paitbah kin ym sngewthuh bakla.