Lyngba ka prokram seng kam lajong ba la pynkhreh da u MLA ïoh jinghikai ki samla

Jowai,Nailur 24: Ka prokram ai jinghikai ne ka ‘Training For Business Start-Up’ kaba 45 sngi bala pynkhreh da u MLA ka 2-Jowai Constituency ma Wailadmiki Shylla na ka bynta ki khun samla ba kin ïeng hala ki jong ki kjat la jong, Hynnin ka sngi 23 tarik u Nailur 2022 la pynkut noh ïa ka Indoor Sports Hall jong ka Chutwakhu, Jowai.
Ha kane ka prokram ai jinghikai kila don haduh 60 ngut ki samla kila la shah hikai, hynrei mynta ka sngi la jied tang san ngut ki samla ban wanrah ïa ki kam ba ki don jingthmu ban pyntrei da ka jingbatai lyngkot lyngba ka Projector. Na kine ki san ngut hadien ka jingbishah kaba bniah la jied ïa ka samla Violet Rose Talang kum ka nongjop kaba la pyni shaphang ka kam ri ngap jong ka, kaba la ïoh ruh ïa ka song pisa kaba 2 lak tyngka ba sdang seng ïa ka kam la jong.
Ha kane ka sngi la wan sakhi naduh u kongsan uba dei u MP ka Rajya Sabha u Dr. Wanweiroy Kharlukhi ha ryngkat ka jingdonlang jong u CEM ka JHADC u ma Thombor Shiwat, u Prafulla Kumar Boro, MCS: Additional Deputy Commissioner, u Principal jong ka College u Dr. D.G. Lyngdoh, bah B. Mawlong, MCS Director MBMA, bah A. Malniang General Manager DCIC WJH, ma B. Langbang DBO Thadlaskeiñ, ki MDC nalor kiwei de kiba la shah khot sngewbha.
Ïa kane ka prokram ai jingai jinghikai ba 45 sngi ïa ki samla la pynlong ha Thomas Jones KJP Synod College Jowai da ka jingwan ai jingïarap jong ki riew shemphang ban batai bniah shapoh ki lad seng kam ba pher bapher ha ryngkat ka jingïarap kaba lah ban ïoh ne ki tnad sorkar bad kumjuh ki Bank ba marjan.
U kongsan ma u Dr. Wanweiroy Kharlukhi haba ai jingkren ula ai ka jingïaroh ïa u MLA ma Wailadmiki uba la shim ïa kum kane ka bynta kaba kongsan eh jong ki samla wankam ha kum kane ka juk ba mynta, ula ai ka jingkitbok kumjuh ïa ki samla kiba la ïoh ka jinghikai ba kin long kiba janai ha ka kam bad ban trei shitom ïa ka kam lajong kaba ki thmu ban seng ha ka jingim.
Na ka liang u ma Wailadmiki ha ka jingkren ula ong mynta dei ka pyrthei kyrduh kam kyrduh jam kumta la donkam ban pynleit jingmut ban wad ki lad ki lynti kumno ban seng noh ïa ki kam la jong, ym ban shañiah tang ha ka kam sorkar.
U ma MLA ula pynsngew ruh shaphang ki lad jingïarap kiba lah ban ïoh lyngba ka Prime Minister Employment Generation Programme (PMEGP) kaba long haduh 50 lak tyngka ha ryngkat ka subsidy kaba rit, wat na ka liang ka ophis jong ka District Commerce & Industries Centre, West Jaiñtia Hills Jowai ka kloi ban ïarap ïa kane sha ki samla wad kam. Shuh shuh u don ka jingkyrmen skhem ba ïa kane ka kam ai jinghikai ïa ki samla kan sa bteng biang ha kine ki snem ban wan.