Shillong, Jymmang 05 : U Myntri Rangbah ka jylla, Conrad K Sangma ryngkat u Myntri Rangbah ka Sikkim, u Prem Singh Tamang ha ka sngi Palei ki la plie paidbah ïa ka lympung North East Food Show (NEFS) kaba long ha madan Polo, Shillong ha ryngkat ka jingdonlang u Myntri ka tnad Agriculture ka jylla, Bah Banteidor Lyngdoh kumjuh ruh u Myntri ka tnad Tourism ka Sikkim u Bidu Singh Panth.
Haba kren ha katei ka jingïalang, u Myntri Rangbah ka jylla u la ong, “Lyngba ka Northeast Food Show ka plie lad ïa ki nongtreikam la jong bad ruh ïa ki nongrep ka jylla bad na ka thaiñ shatei lam-mihngi jong ka Ri ban pynïaid iew ïa ki mar-rep jong ki sha barri.”
Kumban shu pynkynmaw, ka Meghalaya da ka jingïatrei lang bad ka SIAL, ka la sdang ban pynlong ïa kane ka lympung ha ka sien kaba nyngkong eh ha u snem 2019 bad kane kadei ka sien kaba ar ha kaba ki nongthied bad nongdie na kylleng ki bynta jong ka thaiñ kynthup ïa ki ri na dewbah South East Asia ki wan ban shim bynta lang.
U Conrad u la ong ruh ba katei ka rynsan ka long ruh kum ka kad khaïi na ka bynta ban pynkynduh lang ïa ki nongdie bad nongthied bad khamtam eh ban pynïaid ïew bha ïa ki mar ba pynmih na ki mar rep.
U ong ruh ba katei ka lympung kam dei tang ban pyni nam ïa ki marbam hynrei ruh kum ka jingkynduh lang naduh ki nongtreikam lajong, ki nongrep, ki cooperative society, ki self help group ba kin lah ban pynïar ïa ka jingtreikam.
“Kane ka long ruh kum ka jingpyni ïa baroh ka jingtreikam ba ïadei bad ki mar rep, la ka long naduh ka jingpynmih, ka rukom sop bad ka rukom pynbit pynbiang tad haduh ban da lah ban ïa ryngkat bad lah ban ïakob lang ha ka pyrthei baroh kawei,” u la ong.
U Myntri Rangbah u la pyntip ruh ba katei ka lympung ka plie lad ruh ïa ki ban ïasoh lang bad ki ri ka dewbah South East Asia. Da kaba kdew ïa ka nuksa jong ka Vietnam haba ïadei bad ka jinglah jong ka ban pynïaid ïew ïa ki marbam, u Myntri Rangbah u ong ba ka thaiñ shatei lam-mihngi jong ka Ri da ka jingïatrei lang kum ka kynhun ki lah ban poi lang ha ka rynsan ban pynpaw pyrthei bad pynïaid ïew ïa ki mar.
“Ka sienjam ba la shim da ka sorkar Vietnam kumjuh ki nongshong shnong jong ka, ki la lah ban pynkylla ïa ka ri da ka jingtrei borbah ki nongtreikam lajong lyngba ka polisi treikam jong ka sorkar. Nga ngeit ba ka Vietnam kadei kawei ka ri kaba nga ñiew burom bha bad nga sngew ruh ba ngi don bun bha ba ngi hap ban tip na ki,” bynrap shuh shuh u Conrad.
Ha kane ka sngi u la ong ruh ba ka Meghalaya kan ïai bteng ban pynlong ïa katei ka lympung bad ban pynheh shuh shuh katba nang ïaid ki snem.
Na ka liang u Myntri Rangbah ka Sikkim pat u la ai ka jingïaroh ïa u Myntri Rangbah ka jylla halor ka jingpoi kynmaw jong u ban pynlong ïa katei ka lympung ban kyntiew ïaki nongrep bad ki nongtrei kam lajong. U ong ruh ba lyngba katei ka lympung kan ïarap bad kyntiew stet ïa ka rep ka riang ha ka thaiñ shatei lam-mihngi jong ka Ri.
Ha kane ka sngi la wan ban shim bynta ruh da u Pham Sanh Chau, Ambassador, Embassy jong ka Socialist Republic Vietnam, Ram Prasad Subedi, Charge d’Affaire, Embassy ka Nepal ha India, ki nongmihkhmat na Japan ha India, nangta u Myntri ka sorkar Sikkim, Chief Secretary, Meghalaya, Kong R V Suchiang, ki nongmihkhmat na kiwei ki ri kum na Chile, Poland, Austria, United Kingdom bad European Union, kumjuh ki heh sorkar na ka sorkar Pdeng bad na kiwei ki jylla nalor ki nongtreikam lajong, ki nongdie nongthied bad kiwei kiwei.
