Shillong, Nailar, 27: Ka Meghalaya State Legal Services Authority ha ryngkat ka jingïatreilang bad ka Directorate of Social Welfare, Health & Family Welfare Department, C&RD Department, District Legal Services Authority, East Khasi Hills bad kiwei kiwei ki kynhun ha ka sngi Saitjaiñ ki la pynlong ïa ka jingai jingsumar ei bad ai ïa ki jingpynshai halor ka NALSA (Effective Implementation of Poverty Alleviation) Scheme 2015 bad ka ki skhim Sorkar halor ka phang “ban pun jingkieng’ ïa kaba la pynlong ha St Peter’s Secondary School, Dangar, East Khasi Hills District.
U Justice H S Thangkhiew, u Nongbishar jong ka Iingbishar Meghalaya High Court bad uba long ruh u Executive Chairman jong ka MSLSA u la ïashim bynta ha kane ka sngi kum u Kongsan.
Haba kren kum u Kongsan u Bah H. S Thangkhiew u la pynshai ha kane ka jingïalang shaphang ka NALSA scheme.
U Bah Thangkhiew u la kyntu ïa ki nongshong shnong ba kin wan shakhmat bad ban ïarap ïa ki paidbah kiba donkam jingïarap na ka aiñ da kaba pynrung kyrteng ïalade kum ki Para-legal Volunteers; kaba long kawei na ki kynhun kaba pynkynduh markhmat hapdeng ki paidbah bad ka ingbishar.
Ha kane ka sngi, u Kongsan u la leit jngoh ïa ki jaka ba la buh da ki tnat treikam bapher bapher bad aiti ruh ïa ki Wheelchairs, ki Hearing Aids bad ki Walking Sticks sha ki briew kiba duna dkhotmet.
