Lyngba ka ‘Mission Educational Rehabilitation’ thmu ai jaka riehtngen ka USTM ïa kiba shah kyndang na Assam

Nongpoh, Naitung 28: Ka seng Ri-Bhoi People’s Council, sengkmie mynta ka sngi kila leit ban ïakynduh syndon ïa u Deputy Commissioner ka Ri-Bhoi District ban ujor bad pyrshah halor ka jingthmu jong ka skulbah University of Science and Technology Meghalaya ban ai jaka riehtngen bad ka jingpule ïaki khynnah kiba don sap bad ki bym don iing don sem lyngba ka ‘Mission Educational Rehabilitation’ hadien ka jingkyndang naphang ka sorkar Assam ïa kiba sah beaiñ bad riehtngen ha katei ka jylla.
Haba kren sha ki lad pathai khubor hadien ka jingleit kynduh ïa u DC ka Ri-Bhoi naka liang u Samla Jayson Lennox Nongrum President ka RBPC haka jingdonlang u Samla Vincent Sohkhwai General Secretary lem bad ki dkhot u la ong ba kum ka seng ka dap da ka jingsngewkhia halor katei ka jingthmu jong ka skulbah USTM lem bad ka ERDF kaba dei ka sponsoring body kaba la pynbna ban shim ïaka rai ban ai ka jingkyrshan ïaki khynnah ki bym don iing don sem, kiba shah kyndang na Assam lyngba ka ‘Mission Educational Rehabilitation’.
U la ong ruh hadien ka jingkyndang naphang jong ka Assam ïa kiba sah beaiñ, ka USTM kan ailad ïakitei ki longiing ban shong ban sah bad wat ka jingpule lyngba katei ka thong jong ka, bad kum ka seng kala buh da ka jingthoh haka miej jong u DC ban pyrshah ïa ka jingthmu jong katei ka shlem hikai kaba don hapoh ka jylla, namar ki don shibun ki khynnah kiba dei hok ban ioh kim shym ioh ka lad ban pule, katba kitei kiba sah beaiñ shabar ka jylla kin ioh ïaka lad ban pule puthi bad wat ka jaka sah bad kiba bun hi kidei ki Muslim.
U la ong ruh ba lehse ka jingthmu jong katei ka skulbah ka long ban leh ïaka kam ba bha bad isynei najrong, hynrei ka don kaei kaei sha lyndet namar kiba bun hi kiba shah kyndang ki dei ki muslim kiba sah beaiñ haka jylla Assam bad lada kine ki longiing ki ioh ka jingtyrwa kaba kyrpang na katei ka skulbah kaba don haka jylla Meghalaya, ka long kum ka jingñiew beiñ ïa kiba bun ki samla pule naka jylla lajong kiba wan naki longiing ba duk bad kiba kwah ban pule hynrei kim iohlad satia.
Kumta naka liang ka RBPC kam pyrshah ïaki kam leh siynei hynrei ka pyrshah ïaka jngthmu jong katei ka shlem pule kaba don ha kane ka jylla ban ai jaka riehtngen pat ïakiba la shah beh bad sah beaiñ na kawei ka jylla bad kane ka long kaei kaei ka bym lah ban pdiang bad kyrpad ruh ïaka sorkar jylla ban shimkhia ïa kane ka mat.
Kadei ka thong jong ka skulbah USTM kadei kaba la pynpaw pyrthei da u Mahbubul Hoque ha rynsan facebook hynrei tang hadien katto katne kynta u la delete noh ïa katei kaba u la dep pynbna.