Lyngba ka mela la rakhe ïa ka mynsiem jingïalong kawei hapoh ka kynhun ki shipai BSF

Shillong, Risaw 19: Ïa ka Mela kaba la pynkhreh bha da ki shipai BSF la plie da ka Alka Upadhyay bad O.P. Upadhyay, Inspector General, ha ka Frontier Headquarter, Shillong. Kane ka Mela ka la wanrah lang ïa baroh ki Sector bad ki Unit kiba don hapoh ka Frontier, ha kaba la rakhe ruh ïa ka mynsiem jong ka jingïalong kawei, ka koit ka khiah bad kiwei ki bynta hapoh ka kynhun ki shipai BSF.
Ha kane ka Mela la ïohi ïa ka jingdon bun ki dukan bapher bapher ba la buh da ki Unit, kiba die ïa ki jingbam tynrai bad kiba ju shet ha kane ka thaiñ. Ka jingpynlong ïa kane ka Mela ka long ban kyntiew ïa ki lad jingtip halor ki bam kiba tei met kiba pynshlur ban kynthup lang hapoh ka bam kaba manla ka sngi na ka bynta ka koit ka khiah kaba bha bad ka jingneh jong ka.
Kane ka Mela ka don ruh ki jingïalehkai, ki jingpyni ïa ki kolshor, bad ki kam ba la pyni da ki shipai bad ki ïing ki sem jong ki. Kine ki dukan bad ki jingkhring jong ki kam ba la buh da ki BSF ka pyni ïa ki kam ba shem thymmai, ka jingïatreilang kum ka kynhun, bad ka jingriewspah ka kolshor jong ki unit kiba la ïashim bynta, kaba thaw ruh ïa ka sawdong sawkun kaba don jingim.
Ha ka jingkren, u O.P. Upadhyay u la ïaroh ïa ka jingïashim bynta ba shitrhem jong baroh ki Sector bad ki Unit, bad u la ai burom ïa ki jingpyrshang jong ki ban pynlong kum kane ka prokram kaba ai jingim bad kaba don jingmut.
U la banjur halor ka jinglong kongsan jong kane ka jingïalumlang kaba wanrah ka mynsiem ka jingshaniah, ka jingpynkhih ïa ka jingim bad ka bha ka miat ki ïing ki sem shipai BSF kiba la ai ki jingshakri ba khlem shong thait ban ai jingshngaiñ ïa ki khappud jong ka ri.
Ka Mela ka la kutnoh da ki kyntien ai burom ïa baroh kiba la wan shim bynta bad ki nongpynïaid halor ki jingaiti bad nohsynniang jong ki ba la pynlong ïa kane ka prokram kaba jop bad bakhraw. Kane ka sngi ka la wanrah ruh ïa ka mynsiem ka jingjop, ka jingkmen, ka jingïalong kawei bad ka bha ka miat ïa ki longïing longsem jong ki shipai BSF bad kaba la pynkhlaiñ ïa ka jingïateh kum shipara hapoh kane ka kynhun shipai.