Lyngba ka Lulu Group International, ïoh lad ki nongrep ban die ïa ki marrep ha ki ïew ki ri ka pyrthei

Shillong, Naitung 14: Ki 8 ngut ki nongmihkhmat high-level na ka Lulu Group International, ba la ïalam da Salim M.A., Director, Global Operations, ki la wanjngoh ïa ka Meghalaya na ka bynta ban ïakren halor ki jingthmu ban pynkhlaiñ ïa ki kam khaïi hapoh ki ïew jong ki ri haba ïadei bad ki marrep ba la pynmih na ka jylla.
Kane ka jingwan jngoh la pynbud ruh da ka jingïasoi Memorandum of Understanding (MoU) hapdeng ka Lulu Group International bad ka Meghalaya State Agricultural Marketing Board (MSAMB) ha u Naiwieng 2023 ha ka World Food India, New Delhi, ba la ïarap ruh da ka APEDA.
Ha kine ki 2 snem ba la leit, ka MSAMB ka la shim bynta ban pynsuk ïa ka kam shalan ba ïadei bad GI-tagged Khasi Mandarin, u sohtrun bad u sying lyngba ka liengsuiñ bad ka duriaw.
Kine ki nongmihkhmat ki la pynlong ruh ka jingïalang bad u Conrad K. Sangma, Myntri Rangbah ka jylla, ka Dr. Mazel Ampareen Lyngdoh, Myntri ka tnat Agriculture & Farmers’ Welfare, bad ki secretary na ka tnat.
Na ka liang u Myntri Rangbah u la pynthikna ïa ki nongmihkhmat ïa ka jingkyrshan ba pura na ka sorkar halor kane ka kam. “Ka thong jong ngi ka long ba ki mar ba la pynmih na ka jylla ki dei ban leit khambun sha ki ïew ki ri ka pyrthei bad ba ki dei ban ïaibteng ban kiew,” ong u Conrad K Sangma.
Ha ki snem ba la leit, ka sorkar Meghalaya ka la shim ka sienjam kaba shlur ban thaw ïa ka jingshalan mar kaba beit beit haba ïadei bad ki marrep khamtam kito kiba la don ki Geographical Indication (GI) tag bad kiba la ïoh ki jingithuh.
Kum ka dak jong kane ka sienjam, ka sorkar jylla ka la ïarap ban shalan beit ïa GI-tagged Khasi Mandarin sha Dubai lyngba ka air cargo na Guwahati Customs. Kane ka kdew ïa ka jingïarap ka sorkar ban shalan ïa ki marrep kiba lah ban sniew kloi bad ban pynsted ka jingshalan ïa ki ha ka por kaba kloi.
Ka Meghalaya ka la ïoh ka jingjop ban shalan ïa kumba palat 13 metric ton jong GI-tagged Khasi Mandarin bad 10 metric ton u sohtrun sha ki ïew ha Middle East.
Shuh shuh ka jylla ka la shalan ruh kumba 15 metric ton u sying sha Dubai ha u bnai Lber 2025, ba la ïarap da ka Meghalaya State Agricultural Marketing Board (MSAMB) da ka jingïatreilang bad ka Eastern Ri-Bhoi Organic Farmer Producer Company.
Kine ki jingpyrshang da ki jingïatreilang bad ka Lulu Group International, ki la long ki jingangnud ka sorkar ban kyntiew ïa ki ïew jong ki nongrep ba kin ïoh ki lad kamai bad ban buh ïa ki marrep ka jylla ha ka map jong ki ri ka pyrthei.
Shuh shuh la ïathuh ba ka kynhun ba kynthup ïa ki ophisar na ka tnat Agriculture and Farmers’ Welfare bad 8 ngut ki nongrep na kylleng ka jylla ki la leit ban jngoh ïa ka ïew ha Dubai kaba la long naduh ka 16 haduh ka 18 tarik u Lber, 2025. Ki nongrep ki la ïoh ban ïasyllok bad ki nongthied dielang ha Aweer Market, ki la shim bynta ha ka Our Wellness Village Café ha Sharjah, bad sakhi ba ïa ki mar jong ki la pyni paidbah ha Lulu Hypermarket, Silicon Oasis, bad kiwei kiwei.