Shillong, Naiwieng, 18: Ki nongthohkot ba paw jong ka ri India kiba la ïoh ruh bun tylli ki khusnam ki la wan poi ha nongbah Shillong ban ïa don bynta lang ha ka Literary Festival kaba lai sngi kaba la long ha Nan Polo naduh ka 18 haduh ka 20 tarik u Naiwieng 2024.
Katto katne ngut na ki nongthohkot kiba paw kiba don mynta ha nongbah Shillong ki kynthup ïa u Vikram Seth, ka Shobha De, u Jerry Pinto bad kiwei pat.
U Vikram Seth u dei u nongthoh jingïathuh khana lyngkot uba dei ruh ha kajuh ka por u myllung. U dei uba la ïoh bun tylli ki khusnam ba kynthup naduh ka Padma Shri, ka Sahirtya Akademi Award, Pravasi Bharatiya Samman, ka WH Smith Literary Award bad ka Crossword Book Award.
Ka Shobha De ka dei ka nongthohkot kaba la ju tip kum ka Jackie Collin of India. U Jerry Pinto pat u dei u nongthoh uba la ïoh ïa ka khusnam Best Book on Cinema Award, u la jop ruh ïa ka Windham Campbell Prize ha u snem 2016. Nalor kata la donlang ki nongthohkot ba paw na kane ka jylla uba la ïoh bun tylli ki khusnam ha ka ri India kata u bah Kynpham S Nongkynrih.
Kine baroh ki nongthohkot ki la sam ïa ka jingtip sha ki paidbah kumno ba ki sdang ban kylla long ki nongthohkot bad ka jingkit jingmut jingmut jong ka kot ba ki thoh. Ka jingpynlong ïa kane ka tamasa jong ka thoh ka tar ka la pynmyntoi shisha ïa ki samla pule jong ka jylla kiba pynleit jingmut bad kiba sngewtynnad ban thoh kot namarba lyngba kane ka tamasa ki ïoh ïa ka lad ban kylli jingkylla bad ban ïa syllok bad kine ki nongthohkot kiba paw.
