Nongstoiñ, Jymmang 9: Namar ka jingbym don ïa ka surok kaba pynïasoh ïa ki shnong na ka thaiñ Rambrai bad ka thaiñ Nonglang kaba dang hap ha kajuh ka Constituency, ka la buh ïa ki paidbah ha ka jingeh ha ka leit ka wan la ka long ha ki kam shimet ne ki kam paitbah.
Halor kane, u bah B.I Nongsiej President ka Synjuk Nongsynshar Khatphra Shnong ka thaiñ Rimen ba kynthup naduh Pungphreit, Mawlongbah, Mawdet, Mawkhiat, Urkhli, Mawrok, Nongnah, Thiepkseh, Shilliangktieh bad kiwei kiwei ki shnong, u la ong ba ka long kaba donkam haduh katta katta ba kan don noh ka surok shaduh Nonglang.
Utei u nongïalam ka synjuk u la ong ruh ba ki paidbah na kitei ki shnong haba ki leit donkam sha Nonglang, Langja, Langpih, Kyrdum bad kiwei kiwei ki shnong, ki hap ban ïaid na Rambrai sha Nongstoiñ kaba ka jingjngai ka long ar phew kilomitar. Nangta na Nongstoiñ haduh Nonglang ka don sa laiphew san kilomitar, hynrei na Rambrai haduh Nonglang pat ka jingjngai ka long tang kumba khatsan kilomitar tam.
U la ong ba ki nongshong shnong na kitei ki thaiñ, ki don ki kam kiba ki hap ban ïakynduh khah khah bad kiba shong ha ki thaiñ Nonglang, Kyrdum, Langja bad kiwei kiwei, namar ki kam ïing kam sem ki kam kur kam jait bad kiwei kiwei. Kumta, lada don ka surok kaba pynïasoh ïa kitei ki jaka, kan pynsuk shibun ha ka leit ka wan bad ka jinglut ha ka bai leit bai wan ruh kan duna shibun bad kan ym ktah ruh ïa ka por jong ki nongleit nongwan.
U bah Nongsiej u la ong ruh ba hadien ka jingud jingnam bad ka jingai jingmut jong ki paidbah ka thaiñ rimen bad ki thaiñ Nonglang, kum u nongïalam um lah ban shu sngap. Hynrei u la pynsngew sha baroh ki dkhot jong katei ka synjuk, ha kaba ki la shaniah ha u kum u nongïalam ba un pyrshang katba lah ban pynurlong ïa katei ka mat.
Nalor kata u la ong ruh ba ha kaba ïadei bad katei ka surok, u la leit ban ïakynduh ïa ki heh sorkar ha Shillong ban pynsngew bad ban kyrpad ba kin leh ei ei ha kaba ki heh sorkar ruh ki la shah shkor. La ong ba hadien katei ka jingkyrpad jong u, ka sorkar ka la phah ïa ki briew bad ïa katei ka surok ki la dep sorbe.
Kumba long mynta, ka sorkar ka dang pynkhreh ban mang ïa ka pisa na ka bynta ban pynlut ha kaba pyntrei ïa katei ka surok, ka ban bteng na ka surok PMGSY kaba la siang rong haduh Mawrok bad kan ym don jngeh ei ei ruh ba katei ka surok kan urlong kumba ki paidbah ki la angnud.
U la kyntu ruh ïa ki paidbah ba kin ïaishah bad kin ai ka jingïatreilang, khnang ba katei ka kam kam ïaid beit ïaid ryntih haduh ban da lah ban pyndep, khnang ba ki paidbah kin suk ha ka leit ka wan, ka kit ka bah bad ha baroh ki jingdonkam.
