Lyngba ka jingrakhe ïa ka Palm Sunday, sdang ki Khristan ka jingpynkhreh ka jingrakhe ïa ka Paskha

Shillong, Lber 30: Ki paidbah Khristan ha kylleng ka jylla Meghalaya ki la rakhe ïa ka Palm Sunday ka Sngi U Trai Sla Tlai da ka jingngeit bad jingsngew rhem mynsiem, kaba pyni ïa ka jingsdang jong ka taïew Bakhuid (Holy Week) kaba lam sha ka jingïakynduh jingïap bad jingmihpat jong U Khrist ha ka Paskha (Easter.)
Ha Pynthorumkhrah Parish, ki riewngeit ki la ïalum lang ha St. Joseph Higher Secondary School mynstep ban pdiang ïa ki sla tlai ba la kyrkhu na u Lyngdoh Nongsharai, u Parish Priest, Fr. Laurence Nongkseh uba duwai, bad uba la kyrkhu ïa ki sla tlai bad uba la pule ruh na ka Gospel.
Ha kane ka sngi na St. Joseph ki khyllung khynnah bad ki tymmen ki kro ki la ïaid proseshon sha parish, da kaba rah ïa ki sla tlai da ki jingrwai jingïaroh bad ka jingkhot “Hosanna” ka la sawa ha ka surok, kaba pynpaw ïa ka jingkmen bad jingngeit jong ki ban kynmaw ïa ka jingrung donburom jong Jisu sha Jerusalem.
Hadien kane, la pynlong ïa ka Mass Bakhuid bad ka jingpule ïa ka Gospel kaba ïadei bad ka jingshah shitom jong U Khrist. Ha kylleng ki shnong bad ki nongbah ha Meghalaya ruh la sakhi ïa ki paid u Blei bad jingïaid paidbah, da ka jingïashim bynta lang jong ki khynnah bad ki rangbah.
Katkum ka jinghikai ha ka Bible, U Jisu Khrist u la rung sha Jerusalem da kaba shong halor u kada ha ka sngi kaba khatduh shuwa ka jingshah sahnarphna jong u. Ki paidbah ki la siang ïa ki jaiñkup bad ki sla tlai ha surok bad ki la pyrta, “Hosanna ïa U Khun u David” bad “Khublei ïa U uba wan ha ka kyrteng U Trai,” ban pyni ïa u kum U Syiem bad U Nongpynim ba ki ap khmih lynti.
Ka Sngi U Trai (Palm Sunday) ka ai mynsiem ïa ki riewngeit ban pynkhreh ïa ka mynsiem jong ki na ka bynta ka taïew Bakhuid bad ban ïaid ha ka lynti jong ka jingngeit haduh ka sngi Paskha.