Lyngba ka jingpule ba ka jingnang jingtip ka heh, ka pynnep ïa ka jingshemphang: Sanbor

Shillong, Risaw 17: U Myntri ka sorkar jylla uba khmih ïa ka tnat Lariti ne Arts & Culture u Bah Sanbor Shullai u la banjur ba ka jingmlien ban pule ka pyndap ïa ka jinglong kordor naba kane ka ai ruh ka rynsan ban pynïar ïa ka rukom pyrkhat bad ka pynroi ïa ka lynti ka jingnang jingtip.
“Kadei lyngba ka jingpule ba ka jingnang jingtip ka heh bad ka pynnep ïa ka jingshem phang namar kata kane ka pynkylla ïa ki jingim jong ki paidbah babun. Ka jingmlien ban pule kan pynlong ïa ngi ban sngewthuh khambha shuh shuh ïa la ka jong ka kolshor, ka imlang sahlang bad kiwei, ha kaba kane kan pynlong ruh ïa ngi kiba ïoh jingtip khambha bad ki riew shimet kiba la dep pule bha ha ki snem ban wan,” ong u Bah Shullai haba kren ha ka workshop ba shi sngi ba la pynlong da ka Directorate of Arts and Culture kaba hab hapoh ka National Mission on Libraries Scheme ka “Habit of Reading as a tool for Social development and Economic upliftment” kaba la long ha U Soso Tham Auditorium.
Kane ka workshop ka thmu ban kyntiew ïa ka sap pule bad kan pynriewspah ïa ki khynnah pule, ki riew ieid pule kot, ki nongpyndonkam, ki riewshemphang bad ki paidbah da kaba wanrah ïa ki jingmlien ban pule kot bha naba kane kan pynshai ïa ki paidbah ym tang ïa ka jingkmen ban pule bad ban sngewthuh ïa ka jingdonkam ki library bad ka bynta ba ki don ban pynïar ïa ki jingmut jingpyrkhat bad kiwei kiwei.
Kiba ai jingkren ha kane ka sngi halor ki phang bapher bapher ki kynthup ïa Prof Shalini Lihitkar, MLISC, NET. PhD, HOD Department of Library and Information Science, u Rashtrasant Tukadoji Maharaj Nagpur University, Maharashtra bad kiwei kiwei.
Kiba iashim bynta ki kynthup ïa ki samla pule na ki 15 tylli ki skul, ki samla pule na North-Eastern Hill University, Martin Luther Christian University, ki dkhot ka Kali Kit Kot bad Seng Kynthei Laitumkhrah Pyllun, ki riewshemphang halor ka library bad kiba pyndonkam ïa ka library jong ka State Central Library.