Lyngba ka Hello Meghalaya da ki klur ai jingïarap ka sorkar ban kyrshan ïa 47 ngut ki nongshna phlim

Shillong, Jylliew 03: U Myntri Rangbah ka jylla u Conrad Sangma u la sam ïa ki jingbei tyngka kaba da ki klur sha ki 47 ngut ki nongshna phlim ha ki 4 tylli ki kyrdan kaba hab hapoh ka Hello Meghalaya initiative ha ka prokram kaba la long ha Shillong ha ka sngi baar.
Ka jingangnud jong ka sorkar jylla ban ïarap bei pisa lyngba ka prokram kaba la buh ka thong khamtam ban ïarap ïa ki samla ka jylla ha kaba ïadei bad ki kam shna phlim naba kumba ka long mynta la jan 50 per cent na ka jingbun ki nongshong shnong ki dei kiba hapoh ka rta kaba 20 snem. Kine ki jingïarap bei tyngka ka sdang na ka T. 5 lak na ka bynta ki nongshna phlim kiba dang shu sdang kiba shna ïa ki phlim lyngkot sha ka T. 35 lak na ka bynta ki director kiba la slem ba pynmih ïa ki feature film.
Kumba 6 ngut na kiba shna phlim ki la ïoh ïa ka kyrdan kaba heh ha ka Category A grants kaba long T. 35 lak marwei marwei na ka bynta ka jingpynmih ïa ki feature film, katba 18 ngut kiwei pat ki la ïoh mar T. 25 lak hapoh ka Category B. Kumba 4 ngut pat kiba pynmih ïa ki web series ki la ïoh mar T. 20 lak ka jingïarap pisa na ka bynta ka multi-episode content, bad 19 ngut kiba don sap bad kiba dang shu sdang ki la ïoh mar T. 5 lak na ka bynta ki short film project.
“Ngi ngeit ba ki samla jong ngi ki don shibun ki lad, bad ki rynsan kum ka Hello Meghalaya ki ai ïa ki lad kiba dei hok,” ong u Sangma ha ka prokram ba la pynlong ha State Convention Centre. U Myntri Rangbah u la banjur halor ka jingdonkam ban thaw ïa ka sawdong sawkun ha kaba ki samla kin lah ban pyntyllun ïa ki jingangnud jong ki ha kajuh ka por ba kin lah ban ïoh ki lad kamai kajih ba don dor.
Na ka liang u Myntri ka tnat Jngohkai ka jylla u Bah Paul Lyngdoh u la pynpaw ba kumno kane ka jingsdang ka rakhe ïa ka jinglong trai ri trai muluk ki Khasi, Jaiñtia bad ki rukom leh ki Garo haba pynïaid shaphrang ïa ka film sector jong ka jylla. U la pynpaw ka jingpdiang sngewbha ïa kino kino ki jingai jingmut halor ka Meghalaya Film Tourism Policy kaba dang ïaid mynta ban pynbha.
Ha kane ka prokram la pyni ïa ka phlim “Ha Lyngkha Bneng (The Elysian Field)” ba la direct da u Bah Pradip Kurbah, ha kaba kane ka la long u mawmer na ka bynta ki cinema kiba don ha ka jylla.
Ïa ka Filmmaking Exchange Programme ba thymmai la pynbna ha kaba kane ka la wanrah lang ïa kumba 30 ngut ki samla pule na Meghalaya bad Arunachal Pradesh na ka bynta ki masterclass ba la ïalam da u director ba la ïoh khusnam u Dominic Sangma. La ong ba da ka jingïatreilang bad ka Film and Television Institute, Arunachal Pradesh, ka la nang pynkhlaiñ ïa ka jingïalong paralok.
Ïa kane ka prokram la pynkut da ka road show ba la plie paidbah da u Myntri rangbah kum ka dak ka jingpynsngewthuh paidbah haba ïadei bad ka jingdonkam ban kyntiew ïa ki kam shna phlim bad khamtam eh na ka bynta ki cinema kiba don ha ka jylla.