Lyngba ka hat trick jong ka Pynhun rah ka Lumparing ïa ka SSA Women’s League

Shillong, Kyllalyngkot 24: Ka kynhun ïalehkai jong ka Lumparing SC ka la ïoh ban rah ïa ka nam lahduh kaba nyngkong eh ha ka lympung ‘Women’s Football League 2026’ jong ka Shillong Sports Association, da kaba pynliem 3-1 kol ïa ka Laitkor ha ka jingïakhun phainal ha madan First Ground-SSA Stadium, Polo, ha ka sngi Saitjaiñ.
Kane ka khusnam lahduh kaba nyngkong jong ka Lumparing ka la wan lyngba ka hat trick ba la thep da ka Pynhun Shulet (18′, 25′, 60′), katba ka Tracy Rympei (22′) ka la thep ïa ka shi kol na ka bynta ka Laitkor, ka bym shym la lah ban ïada ïa ka burom lahduh ba ka la rah ha ka aïom lehkai ba ladep.
Ka Pynhun ka la ïoh ban pynkhihjar nyngkong da kaba pyndei tiak da ka khlieh ïa ka bol ba la pynrung na ka corner kick ha ka minit kaba 18 hynrei ka Tracy Rympei ka la pynïakhaid na ka bynta ka Laitkor tang hadien saw minit.
Hynrei ka jingïakhaid kam shym la neh slem, namar ba ka Pynhun ka la ïohlad ban pynkhihjar biang hadien ba ka la ïoh ban knieh ïa ka bol na kawei ka thei ïalehkai ba shadien jong ka Laitkor. Kane ka la pynlong ïa ka Lumparing ban jam sha ka por shongthait da kaba lamkhmat da 2-1 kol.
Watla ka Pynhun ka la pynsepei ïa ka kabu ksiar na ka penalty ha ka kylla miet hynrei ka la pyndep ïa ka hat trick jong ka ha ka minit kaba 60, kaba la nang pynskhem shuh shuh ïa ka jingkyrmen jong ka Lumparing ban rah ïa ka khusnam lahduh ba nyngkong ha ka SSA Women’s League.
Ka Laitkor ka la ïakhun tyngeh haduh kaba kut, hynrei kam shym la lah satia ban ïaid lait ïa ka nongap kol jong ka Lumparing ka Priyanka Latam.
Ha kaba kut ka Lumparing ka la ïoh ban pynthikna ïa ka nam lahduh ba nyngkong eh ha ka SSA Women’s Football League, kaba ki la angnud hadien ba ka kynhun ka la ïalehkai bha ha baroh kawei ka aïom. Kum ka lahduh ka Lumparing ka la ïoh khusnam pisa kaba T.50,000, katba ka Laitkor ka la khur ïa ka song pisa kaba T.25,000 kum ka kynhun ba wan ba-ar (runners-up).
Da kane ka jingpynkut ka Laitkor mynta ka la pyndep ha ka kyrdan ba ar ha ki lai tylli ki samoi ïalehkai jong ka SSA Women’s League, kaba pynlong ïa ka haduh mynta kum ka kynhun kaba lah ban pynneh pynsah ïa ka rukom lehkai kaba khlaiñ wat la ka la long kaba sniewbok khyndiat ha ki jingïakhun ban rai ïa ka nam lahduh. Haba ïanujor, kane ka dei ka jingïalehkai phainal kaba nyngkong eh jong ka Lumparing.
Ki la don ruh katto katne ki khusnam shimet ba la sam sha ki thei ïalehkai ba kynsai jong kane ka lympung. Ka Pynhun ka la khur ïa ka nam ‘Player of the Final’, katba ki paralok ba ïalehkai lang ka Catherine Kharkongor ka la khur ar tylli ki khusnam – kum ka Top Scorer bad ka Player of the Tournament, ka Priyanka Latang ka ïoh ïa ka nam Best Goalkeeper.
Nalor kine, ki la don ar ngut ki thei ïalehkai jong ka Pay For Right (PFR) kiba la ïoh khusnam, ha kaba ka Badarisha Kharumnuid ka la ïoh ïa ka khusnam Best Defender katba ka Phibanda Mary Nongrum ïa ka nam ‘Most Promising Player’; nangta ka Bahunlang Synrem jong ka Lumparing ka la ïoh khur ïa ka khusnam Best Midfielder bad khatduh ka Rangdajied United ka la ïoh khur ïa ka khusnam Best Disciplined Team.
Ha kane ka sngi la wan Kongsan da ka Director ka tnad Social Welfare ka kong Camelia Doreen Lyngwa. U kongsan ba kyrpang u dei u Myntri ka tnad Sorkar jylla u Bah Sanbor Shullai, ha ka jingïa donlang ruh u President ka Meghalaya Football Association u bah Hamletson Dohling, ha ryngkat ki dkhot ba kham rangbah jong ka SSA, ba la ïalam da u President, u Bah Banteidor Lyngdoh.