Lyngba ka GCM, ïalap ka ophis u DSO ban sumar mariang, pyndonkam da ki Cycle ha ki lynti bajan

Nongpoh, Naiwieng 21: Ka sorkar jylla lyngba ka thong jong u Myntri Rangbah ban pynkhlaiñ ïa ka jingkhuid ka mariang hapoh ka Chief Minister’s Youth for Green Campaign Movement 2025, ka la pynlong ïa ka jingïalang paidbah mynta ka sngi ha Nongpoh. Kane ka jingïalang la pynïaid da ka ophis u District Sports Officer (DSO) Ri-Bhoi District ha ka jingïatreilang bad ka Nongpoh Town Committee bad ka Ri-Bhoi Cycling Association, ban ai mynsiem ïa ki paidbah ba kin ïaid kjat ne pyndonkam daki bicycle haba leit ha ki jaka kiba jan, khnang ban duna ka jingpyndonkam kali bad ïa ka jingmih jaboh na ki kali.
La pynlong ruh ïa ka Bike Campaign Ride bad ka jingai jinghikai paidbah hakhmat ka Nongpoh Town Shopping Complex. Kane ka Green Campaign ka dei ban wanrah ka jingkitkhlieh jong uwei pa uwei u nongshong shnong ban sumar mariang da kaba leh bun ki kam kiba lah ban pynkylla ïa ka mei mariang, kum ka jingpynduna ka jingpynmih jaboh, thung bad sumar ïa ki dieng ki siej, pyrkhat shwa ban pyndonkam bording elektrik, pyndonkam hok ïa ka um bad kiar ban pynsepei than, bad ruh ban pynkhuid ïa ki sawdong sawkun man ka sngi.
Ha katei ka prokram la ïadonlang ruh ka E Pradhan, Assistant Commissioner Ri-Bhoi District; u Bah Bobby L. Nongbet, DSO Ri-Bhoi; ka kong Rida Lyndem, PTI ka ophis DSO, ki samla pule, ka kynhun ki nongñiah bicycle na Ri-Bhoi bad kiwei kiwei.
Haba kren ha kane ka sngi na ka liang ka E Pradhan kum ka kongsan ka la ong ba kadei ka jingkitkhlieh jong ki briew ban sumar ïa ka mei mariang, kumba ha kine ki khyndiat snem ka mariang ka don shibun ki jingkylla naduh ka jingshit kyr-ang ka suiñbneng, ki aïom kiba la buh jingma shi katdei ïa u bynriew bad ki jingthaw ba im ha kane ka pyrthei.
Ka la ong ruh ba ka jingkylla ka mei mariang ka dei ka mat kaba baroh kawei ka pyrthei ka puson bad pyrkhat bha namar lada ym ïada mynta ka lawei ban wan ha ka pyrthei kan don hapdeng ka jingma kaba khraw.
“Kumta kum u bynriew ngi dei ban shim ka jingkitkhlieh ban ïada ïa ka mariang, ban pynthikna ba lyngba ka jingshimkhia jong ki ka pyrthei sa shisien kan lah ban khie im biang namar lyngba ki jingleh barit jong ngi shisien ka sngi kan wanrah ka jingkylla kaba heh, namar kata ka la kyrpad ruh ïa ki paidbah ban shim ïa ka jingkitkhlieh ban sumar bad pynneh pynsah ïa ka mei mariang bad ki sawdong sawkun ban im ha ka mariang kaba khuid bad kaba lait na ka jingma bad jingjaboh,” ong u Pradhan.