Nongpoh, Naitung, 18: Ka jingangnud jong ki paidbah bad ki nongtrei jong ka Umroi Pyllun Health & Wellness Centre lem bad ki 13 tylli ki shnong ban ioh ïa ka kali kit nongpang (Ambulance) ka la urlong hadien ba u MLA ka Umroi u Bah Damanbait Lamare mynta ka sngi u la leit ban pynlait paidbah ïa kawei ka Ambulance bala aiti sha katei ka jaka sumar.
Ïa katei ka kali la thied lyngba ka jingkyrshan na ka Corporate Social Responsibility (CSR) jong ka Indian Oil Corporation Limited (IOCL) bala pyntreikam pat da ka District Rural Development Agency (DRDA), Ri Bhoi.
Ïa katei ka kali la pynlait paidbah mynta ka sngi da u MLA ka Umroi, Bah Damanbait Lamare ha ka jingdonlang u Raja Brahma, ADC bad Project Director ka DRDA Ri-Bhoi, ka Dr. R. Tlang, BDO Umroi C&RD Block, Bah P.B. Sylliang, Chairman Umroi Pyllun, Kong I. Shadap, Sister in Charge, lem bad ki ASHA bad ki Rangbah Shnong.
Katei ka ambulance kan ai ka jingshakri sha ki 13 shnong kiba hap hapoh ka Umroi Health and Wellness Centre bad la aiti noh sha ka Dorbar Umroi Pyllun ban pynïaid bad ban pynbiang ïa ki jongdonkam naduh u nongñiah bad kiwei ki jinglut jingsep bad ki longkmie ba armet lem bad ki khyllung ba hapoh shisnem kim donkam ban siew pisa.
Haba kren ha kane ka jingïalang, u Bah Damanbait Lamare u la ong ba katei ka ambulance kan long ka jingïarap kaba khraw ha ka liang ka koit ka khiah, khamtam ha ka jingdonkam kyrkieh. U la ai khublei ruh ïa ka IOCL bad ka DRDA kiba la shimkhia ban wanrah ïa kane ka Ambulance na ka bynta ka jingdonkam ki paidbah.
