Nongpoh, Naiwieng 28: Da ka jingkyrshan ba radbah ka sorkar India bad ban pyndep ïa ka thong jong ka ‘100-Day Intensive Action Plan’ kan sa don ka jingïatrei borbah ban pynduh ïa ka kam shongkha khynnah kaba dei ka kam sniew, ka FXB India Suraksha kum kawei na ka kynhun trei mon sngewbha kan ïalam ïa ki kynhun bapher bapher ban ïa trei lang ha Ri Bhoi District kum kata ka thong ban pynduhjaid ïa ka shongkha khynnah bad ban pynlong ruh ïa kane ka District kum ka District kaba lait na ka jingshongkha khynnah.
Ka sorkar India ka la plie paidbah ruh ïa kane ka thong ha ri India lyngba kata ka ‘100 Days Intensive Awareness Campaign’, bad kaba dei ruh ka thong ka Bal Vivah Mukt Bharat ban ïa trei borbah na ka bynta ban pynsaphriang ïa ki khubor ne ban ïalap ha ki skul, ki kolej, ki jaka mane blei ne sha ki shnong ki thaw ban ïa trei ryngkat ban pynduh jaid syndon ïa kakam shong kha khynnah.
Haba phai halor ka jingpyntreikam ïa kane ka thong ban pynduhjaid ïa ka kam shongkha khynnah, ka FXB India Suraksha ka dei kawei na ka kynhun ban ïatrei lang bad ka Just Rights for Children (JRC) ha ka ri ha India bad kaba dei ruh ka kynhun treikam ba la heh bha kaba don haduh 250 tylli ki kynhun ki ban ïa shnoh kti lang na ka bynta ban pynurlong ka kane ka thong ban pynkut noh ïa ka shongkha khynnah ha ki 451 tylli ki District kiba don hapoh ka ri India.
Kumba la plie paidbah ïa kane ka jingïalap ne ka thong mynta u snem lyngba ka ‘Bal Vivah Mukt Bharat’ ba la pynbna paidbah ha ka 27 tarik u Naiwieng 2024, ka FXB India Suraksha kum ka kynhun ba lamkhmat kan leit ban ïalap ne pynphriang khubor sha ki skul, ki kolej, ki jaka mane blei ne sha ki shnong ki thaw bad ban shim ruh ïa ka jingsmai ban ïa trei lang na ka bynta ban pyndep ïa katei ka thong ban pynlong ïa kane ka District kum ka District kaba lait na ka jingshongkha khynnah.
Haba lam khmat ïa kane ka jingïalap halor katei ka thong, u Deputy Commissioner ka Ri Bhoi u Abhilash Baranwal, u la ong ba ka kam shongkha khynnah ka dei kakam kaba long beaiñ bad baroh ki shnong ki thaw ki hap ban don lang ka jingkitkhlieh ban ïada na ka jingdon ka jingshongkha khynnah bad ban pynlong ruh ïa kane ka District kum ka District kaba lait na ka jingshongkha khynnah.
U la bynrap ruh da kaba ong, baroh ki nongshong shnong, ki nongïalam ha Ri Bhoi ki dei ban don ka jingïatrei lang na ka bynta ban pynlong ïa kane ka District ban lait ka jingshongkha khyhnnah. U la ong ruh katei ka kynhun kan bteng ban ïalap halor ka jingktah ka shongkha khynnah bad kaba long beaiñ bad kino kino kiba don kti ha kam shongkha khynnah kin nym lait na ka jingpynshitom kaba dei katkum ka Child Marriage Act, u la bynrap.
