Lyngba ka ALIMCO, myntoi ki riew tymmen bad kiba thut dkhotmet ha thaiñ Jirang

Nongpoh, Risaw 08: Ka ophis u Block Development Officer ka Jirang C&RD Block mynta ka sngi ka la pynlong ïa ka prokram ban sam ïa ki tiar jingïarap sha kito kiba don jingduna ha ki dkhot met bad ruh na ka bynta kito ki riew tymmen kiba la noh ka rta (Senior Citizen), ïa kaba la pynlong ha Jirang C&RD Block.
Ka jingsam ïa kitei ki tiar ka long kum shi bynta ban phai khmat kyrpang sha kito kiba don ka jingduna ha ki dkhot met bad na ka bynta kito ki riew tymmen kiba la noh ka rta, ban ïarap ïa ki ha ki bynta bapher bapher ha ka jingeh kaba ki ïakynduh man ka sngi.
Ha kane ka sngi la wan ban sakhi ban don bynta lang da u Bah Sosthenes Sohtun Myntri ka tnad C&RD ba dei ruh u MLA, MDC Jirang Constituency kum u kongsan ha ka jingdon lang u BDO ka Jirang C&RD Block, u P. Hajong, ka kong F Sun District Social Welfare Officer ka Ri Bhoi, ki nongmihkhamt na ka Artificial Limbs Manufacture Corporation of India (ALIMCO), kaba la ïarap kyrpang ïa kitei ki tiar sha kitei ki briew ba don jingduna ha ka dkhot met bad ki riew tymmen khlem kano kano ka jingsiew.
Baroh ki nongioh jingmyntoi naduh ki riew tymmen haduh kiba duna dkhotmet ki don kumba 530 ngut hynrei mynta ka sngi la ioh ban sam shuwa tang ïa kumba 200 ngut ki nongioh jingmyntoi bad ki tiar ba la sam ha katei ka sngi ki kynthup ïa ki wheelchair, ki tricycle , ki diengduh na ka bynta kiba dkoh bad ki bym nangïaid, ki tiar jingpynpsawa lane ki Sound System sha kito kiba duna Dkhot met kiba don ïa ki sap ha ka rwai ka siaw, u tiar pyniohsngew na ka bynta kito ki bym ioh sngewbha ha ki skhor bad shibun kiwei kiwei.