Nongpoh, Naiwieng 12: U Myntri Khynnah ka sorkar pdeng ba dei peit ïaka tnad Consumer Affairs, Food and Public Distribution u BL Verma mynta ka sngi u la lum ïaki ophisar naki tnad sorkar bapher bapher ka Ri-Bhoi District ban wad jingtip bad buddien halor ka jingpyntreikam ïaki kam pynroi jong ka sorkar pdeng khamtam ha Ri-Bhoi District kaba dei kawei naki Aspirational District haka ri.
Haba kren sha ki lad pathai khubor naka liang u BL Verma u la ong ba u Myntri Rangbah ka ri u Narendra Modi u don ka jingsngewkhia kaba jur ha kaba ïadei bad ka roi ka par haka thaiñ shatei lam mihngi bad u la wan bunsien sha kane ka thaiñ ban bishar hi dalade ban pynthikna ïaki kam pynroi sha kane ka thaiñ.
U Verma u la ai ruh ka jingïaroh ïaka Ri-Bhoi District kaba la kiew shaphrang ha kaba ïadei bad ki kam pynroi bad pynpaw ïa ka jingkmen hapoh ka jingïalam u Myntri Rangbah ka jylla u Conrad K. Sangma bad pynskhem ruh ba ka sorkar pdeng kan pdeng ban ïatreilang bad ka sorkar jylla, ban pynkylla ïa ka jylla Meghalaya sha ka jylla kaba kiew shaphrang haki kam pynroi.
Ha kane ka sngi nalor ki ophisar naki tnad sorkar bapher bapher la sakhi ruh da ka jingdonlang u Bah Mayral Born Syiem MLA ka Nongpoh, u Abhilash Baranwal Deputy Commissioner ka Ri-Bhoi bad kiwei kiwei.
Na ka liang utei u myntri u la sdang ïa ka jingjurip jong u na ka One Stop Centre kaba don ha Nongpoh, hadien kata la leit ban jurip ïa ki dukan die marbam ha Mawtnum Fair Price Shop, ka tnad pynmih marbam ha Umdihar, bad ka jaka ai jingsumar Health and Wellness Centre ha Umroi.
