Lum u MLA Mahati ïa ki Nongïalam bad ophisar, ka jingpynkhreh ïa ka Khasi-Jaintia Christian Endeavour Convention ha Tyrso
Nongpoh, Naitung, 12: Shwa ba ka Balang Presbyterian Tyrso ba hap ha ka Ri Bhoi Synod kan pdiang ïa kawei na ka jingïaseng heh ba la tip kum ka’ Khasi-Jaiñtia Christian Endeavour Convention 2026’ ha ka shnong Tyrso ha Ri Bhoi District, u MLA ka Mawhati u Bah Charles Marngar mynta ka sngi kum u nongmihkhmat paidbah u la shim khia ban lum ban lang na ka bynta ban ïa kren sani halor ki jingdonkam ban pynbit pynbiang na ka bynta ban pdiang ïa katei ka jingïaseng lane ka lympung kaba heh bha hapoh ka Balang Presbyterian Tyrso.
Kane ka Khasi Jaiñtia Christian Endeavour Convention, ka dei kawei na ka lympungbah ki paid riewngeit ka Balang Presbyterian ba la pynbeit ban pynlong ha u bnai Rymphang 2026 ha ka Balang Presbyterian Tyrso. Ki paid riewngeit ka Balang Presbyterian na kylleng ka ri Khasi-Jaiñtia kin sa ïa poi sha kane ka jingïaseng ba la pdaing da ka Balang Presbyterian Tyrso ba hap ha ka Nongtung Pastorate, ka Ri Bhoi Mihngi Presbytery jong ka Ri Bhoi Synod.
Ban ïa kren halor shibun ki jingdonkam ha kaba pynkhreh ïa kane ka jingïaseng, u MLA ka Mawhati u Bah Charles Marngar mynta ka sngi u la lum la lang naduh ki Nongïalam ka Nongtung Pastorate, ki nongïalam ka Balang Tyrso, ka Reception Committee bad kynthup ruh na ki nongmihkhmat na ki tnad sorkar naduh ka tnad PWD (Roads) Umsning Division, PHE Umsning Division, bad ka tnad MePDCL Umiam Division na ka bynta ban ïa kren halor ki jingdonkam ha kaba pynkhreh ïa kane ka jingïaseng.
Haba kren sha ki nongthoh khubor, u Rev. D. Sawkmie, Executive Secfertary ka Nongtung Pastorate u la ong ba kane ka jingïakynduh lang ka long ban ïa kren na ïa thir sani ïa ki kam ki jam na ka bynta ban pdiang ïa katei ka jingïaseng bad ki bynta kiba hakhmat eh ba la ïa kren ki kynthup ïa ka jingdonkam ban pynbit pynbiang ïa ki surok, ki umbam umdih bad kumjuh ruh ban pynbiang ïa ki bording ilektri kiba long ki jingdonkam kiba hakmat eh.
Shuh shuh, u Rev. Sawkmie u la pynpaw ruh ïa ka mynsiem jong ka jingkyrmen ba u MLA kaw Mawhati u Bah Charles Marngar ula ai ka jingkyrshan kaba pura ban pdiang ïa kane ka jingïaseng bad u kyrmen skhem ruh da ka jingshim khia u MLA baroh ki jingpykhreh kin long kiba jop bad khamtam ban pynlong ïa katei ka jingïaseng kaba phuh ba phieng bad kaba ai jingmyntoi ïa ki paid riewngeit ka Balang Presbyterian.