SHILLONG, Naiwieng 18: U Symbud Myntri Rangbah ka Jylla (Dy CM) – u Sniawbhalang Dhar ha ka Lah Sngi U Blei (ka 18 tarik Naiwieng) u la lumlang ïa ki Ophisar ryngkat bad ki dkhot nongïalam ki synjuk bapher bapher ban ïatai halor ka jingpynkhreh ïa ka 6th Meghalaya Games 2025.
ïa kane ka jingïalang la pynlong ha kamra treikam u Dy CM, ha ka jingïadon ryngkatlang u W Shylla, MLA jong ka Jowai, u Dr Vijay Kumar D IAS Commissioner, Sports, u Working President ka MSOA- u Bah John F Kharshiing, nangta u Bah Finely L Pariat – General Secretary MSOA & Organising Secretary, Bah Hamlet Dohling- nongai jingmut jong ka Sorkar Meghalaya & President ka MFA, u IAS, Deputy Commissioner, WJHD-BS Sohliya, u Diki D Shira-MCS, Director DSYA, ka D Lyngdoh, MCS Addl Deputy Commissioner, WJHD, ki Ophisar na ka PWD, PHE, DSYA, Jowai Municipal, ki Sports Consultants, bad kiwei kiwei kiba ïadon byntalang.
Ka tnat Sports jong ka Sorkar Jylla ka la ai jingkren halor ki jingpynkhreh kiba dang ïaid shakhmat na ka bynta ka 6th Meghalaya Games. Ha kane ka jingïalang la pyntip ba la ïoh ban bynta ïa ki jaka sah na bynta ki 3825 ngut ki nongïalehkai bad 450 ngut ki nongpynïaid (Technical Official) bad ka jingpynkhreh ban pynkylladur ïa ki jaka ïalehkai ka dang ïaid shakhmat na ka bynta 25 tylli ki jait jingïalehkai bad 4 tylli ki demo sports.
