Lum u Dy.CM ba peit ïa ka tnad kam pohïing ïa ka jingïalang ban ïakhun pyrshah ïa u drok

Shillong, Rymphang 13 : U Symbud Myntri Rangbah ka jylla uba peit ïa ka tnad kam pohïing ka jylla u bah Prestone Tynsong mynta ka sngi u la lum ïa ka jingïalang na ka bynta ban ïakren bad ïamir jingmut lang da kiei ki lad ki lynti ba kin shim nangne shakhmat ban ïaleh pyrshah ïa ka jingjyllei u drok ha ka jylla.
“ Ka jingïalang mynta ka sngi ka dei shwa tang ka jingïamir jingmut kumno ban ïakhun pyrshah ïa ka thma pyrshah ïa u drok uba la jyllei palat ha ka jylla “ ong u u bah Prestone.
Ha kane ka jingialang la don lang ka DGP ka jylla Kong Idashisha Nongrang, Mission Director ka DREAM u bah Francis Kharshiing, ki ophisar na ka tnad Social Welfare, CEO ka Cantonment, Shillong bad kiwei kiwei.
“ Lehse naduh kane ka taiew ban wan ki bor pulit ANTF bad kiwei kiwei ki bor kin leh da kaba tyngeh ïa kito kiba donkti ban khaïi bad dih drok ha ka jylla” ong u Symbud Myntri Rangbah.