Nongstoiñ, Naitung, 07: Naduh ba ka sorkar ka la pynthymmai ïa ki nongïalam bad ki dkhot jong ka Regional Committee on Border Dispute na ka bynta jong ka West Khasi Hills, kaba don ar tylli ki jaka ïa kajia pud, ha kaba ka jingpynbeit ïa ki jaka kiba hap ha ka wat kaba nyngkong la lah ban pyndep bad ïa ka Langpih sector kaba hap ha ka jingpynbeit ha ka wat ka ba ar ym shym pat la pyndep satia.
Kumta ka sorkar ka la pynthymmai noh ïa ki nongïalam bad ki dkhot jong ka Committee bad ka la thung ïa u bah Paul Lyngdoh Myntri ka tnad pynroi sor kum u chairman jong ka Regional Committee bad ki dkhot jong katei ka Committee ki long u bah Renikton Lyngdoh Tongkhar chairman barim ka Regional Committee, u bah Methodius Dkhar MLA ka Mawshynrut, bah Gabriel Wahlang MLA ka Nongstoiñ, bah Gigur Myrthong MDC ka Mawshynrut,bah Pynshngaiñ N Syiem Deputy CEM ka KHADC, bah K.P.Pangñiang MLA barim ka Rambrai Jyrngam ,bah R.G.Momin MLA ba mynta jong ka Rambrai Jyrngam, bah Bajop Pyngrope MDC ka Rambrai Jyrngam, bah Hindro Samakha sordar ba rim ka Raidmynsaw.
Kumta u bah Paul Lyngdoh kum u chairman jong ka Committee mynta ka sngi thohdieng ka 7 tarik Naitung kaba dei ka sien ba nyngkong u la lum ïa baroh ki rangbah shnong na khappud bad ki nongïalam jong ki sengbhalang ban ïathir sani ïa katei ka kam ha shuwa ba ka Committee kan leit ban jurip ïa ki jaka bad ki shnong ki thaw bad ban sngap ïa ka sur na ki paitbah nongshong shnong la ki kwah ban leit sha Assam ne kin sah ha Meghalaya.
Ïa katei ka jingïalang la pynlong ha TRYSEM hall ha ophis jong u Deputy Commissioner West Khasi Hills. Ha shuwa ban ailad ïa ki riew rangbah na ki shnong khappud bad ki nongïalam jong ki sengbhalang ba kin pynsngew ïa ki jingai jingmut kat kum ka jingkwah jong ki paitbah nongshong shnong u bah Garod L.S.N.Dykes Deputry Commissioner ka West Kasi Hills u la ai ka jingkren lamphrang bad pynshai ïa ka phang kaba ka Committee kan sngewthuh kumno ban ïatai.
Hadien ka jingpynshai jong u Deputy Commissioner la ïoh ïa ka jingpynshai ïa ki kyrteng jong ki shnong bad ka jingdon briew na u bah H.K.Thabah Additional Deputy Commissioner.
Katkum ka jingpynshai jong u bah Thabah la ong ba ki don kumba sawphew wei tylli ki shnong kiba don hapdeng jong ka jingïakajia hynrei kat kum ki dulir bad ki dak ki shin kiba paw na ki kam pynroi ba ka sorkar ka la ai sha ki p-aitbah kitei ki sawphew wei tylli ki shnong ki dei kiba hap hapoh West Khasi Hills wat la ki don ki shnong kiba la shong khleh lang bad ki Nepali ruh.
Nalor kata la ong ruh ban a kitei ki sawphew wei tylli ki shnong ki don ki nongshong shnong kiba don ïa ki Election Photo Identity Card , Ration card ha baroh arliang kata ha Meghalaya bad ha Assam bad ki don ruh ki kyrteng jong ki shnong hynrei haba leit wad ym don shnong shuh.
U la ong ruh ba na ka liang ka sorkar Meghalaya kam don jingartatien ei ei ba kitei ki sawphew wei tylli ki shnong kin don beit ha Meghalaya.Hadien ka jingïatai sani bad ka jingai jingmut jong ki rangbah na ki shnong khappud na ka liang ka Committee ka la pdiang bad mynjur.
U bah Paul Lyngdoh kum u Chairman haba ïakren bad ki nongthoh khubor hadien ba la wai ka jingïalang, u la ong ba ka jingai jingmut jong ki rangbah na khappud ka long kaba shai bad kaba biang bha. Hynrei un sa rah ïa baroh ki jingai jingmut sha ka sorkar.
Na ka liang jong u, un sa pynbeit ïa ka sngi ban leit jurip ïa ki jaka bad ki shnong ki thaw ha khappud, ban pyrshang ban pynsngewthuh sha ka sorkar Assam ba ka jingpynbeit ïa u pud u sam kan long katkum ka mon jong u paitbah nongshong shnong.
Na ka liang u bah Renikton Lyngdoh Tongkhar pat haba kylli halor ka jingpynbeit ïa u pud u sam jong ka Langpih sector, u la ong ba na ka liang ka sorkar Meghalaya ka don ka jingkyrmen, ba ka jingpynbeit pud ha kane ka wat kaba ar kan long kaba seisoh bad kaba ïaid beit khlem kino kino ki jingïania ne ki jingbym hun.
ïa ka jingpynbeit ïa ka Langpih sector, yn hap ban pynshong nongrim janai na ka jinglong jong ki nongshong shnong na rukom hiar pateng ha ka jait ka kynja, ka riti ka dustur, ka niam ka rukom, ka shongkha shongman, ka ka ktien ka thylliej bad ka synshar ka khaddar. U la ong ruh ba ka don ka jingkyrmen ba yn lah ban pynurlong ïa ka jingangnud ki paitbah.
