Lum kyrpang u Myntri ïa ki Ophisar bad Nonghikai ba jur ka jingpep skul shiteng por ha Garo

Tura, Nailar 6 : U Myntri ka Tnad Pule puthi u Rakkam A Sangma ula lum ïa ka jingïalang ba kyrpang ban ïasyllok bad ki Heh Ophisar ka Tnad lem bad ki Nonghikai skul Elementary ka Ri-lum Garo lane bad ka MBoSE halor ka jingjur palat ka jingpep skul shiteng por jong ki Khynnah skul ha Ri-lum Garo.
ïa kane ka jingialang la pynlong ha Circuit House, Tura ha kane ka sngi Saitjain kaba la ïakren sani bha halor ki daw ba pynjyllei ïa ki khynnah kiba pep skul shiteng por bad ban wad ruh ïa ki buit kumno ban weng noh ïa kane ka jingeh.
Haba maitphang ïa ka jingïasyllok, u Myntri ula pyntip ba ka jingpep skul ki khynnah skul ka jur bha ha baroh ki Primary bad Seccondary level, kaba la buh ha ka jingeh ïa ka jingkiew shakhmat bad ka jingroi jong ka thaiñ haba bynrap ba la donkam ban shim ïa ki sienjam kiba donkam ban wad ïa ki daw tynrai bad ban weng noh ïa ki.
U Myntri ula kdew ruh ba ka Sorkar kan sa buh jingkheiñ (map) ïa baroh ki skul Sorkar bad ki Nonghikai bad ban wanrah ruh ïa ka rukom ai jinghikai ba kumjuh ha kine ki sngi ban wan khnang ban lah pynjanai ïa ka jingai jinghikai ïa ki khynnah haba kyrpad ruh ïa ki nonghikai ba kin shim ïa ka jingkitkhlieh ba kin ai ka jinghikai da ka jingaiti lut.
Ha kane ka jingïalang ïasyllok, ka la mih ka jingïakren hapdeng u Myntri, ki Nonghikai Skul bad la ithuh ba ka daw ba kongsan hi halor ka jingpep skul shiteng por jong ki Khynnah ka dei namar ka jingbym biang ki jingtei jong ki jaka pule, ka jingkrih sha Sor, ka jingdon nonghikai ki bym pat pyntbit bad kiwei kiwei.
Ki la don shibun ki jingai jingmut na ki riewshemphang kynthup ïa ki Nongpynïaid skul bad ki heh ka MBoSE ba kynthup ïa u Executive Chairman, MBoSE Tura u Ambrose Ch Marak, Deputy Commissioner, West Garo Hills, Tura Jagdish Chelani, Chairman, Tura Municipal Board, J D Sangma, Additional Deputy Commissioner, WGH Rezia Ch Sangma, Principal, Don Bosco College, Rev. Fr Threnius Sangma bad kiwei kiwei.