Lum ki bor District ka WKH ïa ki sordar bad Hima ha khappud halor ka kam pynbeit pud
![](https://mawphor.com/wp-content/uploads/2023/08/jingialang-wkh-khappud.jpg)
Nongstoiñ, Nailar 21: Ki bor ka Administration ka West Khasi Hills District mynta ka sngi ki la khot ïa ki Nongsynshar ka Hima Nongmynsaw Syiemship, kynthup ruh ïa ki sordar jong ki 53 tylli ki shnong jong katei ka thaiñ, ban ïa kylli pyrthew bad ban ïatai sani ïa ki jingdonkam haba ïadei bad ka jingïapynbeit pud hapdeng ka sorkar jylla Meghalaya bad Assam.
Ïa katei ka jingïalang la pynlong ha Conference Hall jong ka ophis u Deputy Commissioner bad la ïadonlang u bah H.K.Thabah MCS Additional Deputy Commissioner ka West Khasi Hills District, u bah Phlowel Syiem Syiem ka Hima Nongmynsaw Syiemship, u bah J. Marweiñ Additional Director Land Survey Meghalaya u ba la wanrah ruh ïa ka map Meghalaya.
U la ong ba katei ka jingïalang ka dei tang kum shi bynta ban ïakren sani bha ïa ki jaka puta, ban Re Verify ïa ki shnong jong katei ka thaiñ shuwa ba ka Regional Committee on Border Dispute kan hiar sha Assam.
Ha kajuh ka por la wad bniah ruh ïa ki scheme bapher bapher kiba la pyntreikam da ka sorkar Meghalaya ha katei ka thaiñ khnang ba kan ym ïatyngkhuh, namar don ki shnong kiba ka Assam ruh ka buh ne khot kyrteng da ka ktien lajong katba ki Khasi ruh ki khot ki jer da ka ktien lajong.
Ha katei ka jingïalang la ïadonlang ruh ki katto katne ngut ki sordar shnong kumjuh ruh kiba na ki shnong Garo bad kiwei kiwei ki riew pawkhmat jong ka thaiñ Langpih Sector.