Nongpoh, Ïaiong, 22: Ban wanrah ïa ka shongsuk ka shongsaiñ bad ka bha ka miat ha ki shnong ki thaw, ka tnad Pulit Ri Bhoi ka la pynlong ïa ka jingïalang ba kyrpang mynta ka sngi ha Pilangkata Police Outpost. Ha kane ka jingïalang, ki bor pulit ki la ïakynduh bad ki rangbah shnong, ki Secretary shnong bad ki paidbah na ki thaiñ ba marjan.
La lamkhmat ïa kane ka jingïalang da u Bah S. Khymdeit, Officer In-charge ka Pilangkata Police Outpost, uba la ai ruh ïa ka jinghikai sha ki nongïalam shnong halor ka jingdonkam jong ka jingïatrei lang hapdeng ki paidbah bad ki pulit.
Ka mat kaba kham pynshong nongrim ha ka jingïalang ka long halor ka jingdonkam ban thaw ïa ka Village Defence Party (VDP) bad ka Community Liaison Group (CLG), ki kynhun nongtrei mon sngewbha kiba ïatreilang bad ki pulit na ka bynta ka jingpeitngor ïa ka shongsuk ka shongsaiñ ha ki shnong.
La sam ruh ïa ki Application Form jong ka VDP sha ki nongïalam shnong da ka ophis u Officer In-charge, bad la bthah ba kin phah pat sha ka ophis ha shwa ka 10 tarik u Jymmang 2025 na ka bynta ban thung ïa ki President, Secretary bad ki dkhot jong ka VDP.
U Senior Superintendent of Police, u V.S Rathore, u la pynpaw ba kum kine ki jingïalang kin dang pynlong ha kiwei pat ki bynta jong ka district ha ki sngi ban wan. U la ong ruh ba ka tnad pulit ka la buh thong ban pyndep ïa ka jingthung ïa ki VDP ha man la ki shnong shuwa ka 31 tarik u Jymmang 2025.
U la pynpaw ba ka jingdon jong kine ki kynhun VDP bad CLG kan ïarap shibun ha ka jingïatrei lang hapdeng ki paidbah bad ki pulit ban ïaleh pyrshah ïa ki kam sniew kum u drok, ki kam tuh kali, ki case hapoh ka POCSO Act bad kiwei kiwei ki jingjia kiba ktah ïa ka shongsuk ka shongsaiñ.
Ka tnad Pulit Ri Bhoi ka kyrmen ba ka jingïatreilang ha kane ka rukom kan nang pynkhlaiñ ïa ka jingïatylli bad ka jingshong shngaiñ ki paidbah haki shnong bapher bapher ka them Ri-Bhoi.
