Lum ka sorkar ïa ki nongïalam Balang ban ïakhun lang ïa ka thma drok, mang 10klur shisnem

Shillong, Jylliew 15 : Ka sorkar jylla lyngba ka tnad Social Welfare ka la rai ban treilang bad ki Balang bapher bapher kum shi bynta ka jingïakhun pyrshah ïa ka thma drok ha ka jylla.
Ïa kane ka rai la shim ha ka jingïalang ba la lum da u Myntri ka tnad Social Welfare, Bah Paul Lyngdoh ïa ki nongïalam balang bapher bapher ha ka jylla ha Secretariat ha kane ka sngi Palei.
Haba kren bad ki lad pathai khubor hadien ka jingïalang, u Myntri u la ïathuh ba ha katei ka jingïalang ki la don ruh bun ki jingai jingmut kumno ban lah ban ïakhun ïa ki jingshyrkhei jong kitei ki kynja jingdih beaiñ ha ka jylla.
La ïathuh ba ka la don ruh ka jingai jingmut kumno ban pynbun ïa ki jaka syllok, ki prokram ai jingpynshai bad ruh ban pynsngewthuh ba ym dei ban peitkhmat ïa kito kiba ngop ha u drok. “Kum shibynta ka jingïatai, ngi la mynjur ha ki ar tylli ki sienjam, kaba nyngkong ka long ban ïa trei lang bad ki kynhun balang ban mih shakhmat bad snohkti lang ha katei ka thma pyrshah ïa u drok,” ong u Myntri.
Nalorkata, u la ong ruh ba ka sorkar ka la mynjur ruh ban mang haduh 10 klur tyngka ha ka shisnem na ka bynta katei ka jingïakhun pyrshah ïa u drok. Katkum ka jingong jong u, la ïa kren ruh ba kitie ki kynhun Balang mynta kin rah ïa katei ka mat ha ki balang balang jong ki ban ïa kren sani halor katei ka bynta.
Shuh shuh u la ong ruh ba bun ki skul ki hap ha ka jingpeit jong kitei ki kynhun balang, kumta u la shu ai jingmut ba khynnah skul ki lah ban shim ïa ka jingsmai man la ka sngi ba kin ym ngop satia ha ki jingpynshoi jong u drok lane ha kino kino ki kam kiba lah ban ïalam sha kitei ki jingdih ba sniew.
Nalorkata, u ong ruh ba ka sorkar ka la rai ban pynjur ïa ka jingpynshai paidbah halor u drok ha ki hynniew tylli ki distrik kiba paw kum ki hotspot ba jur ka jingdon ki nongdie bad nongdih drok.
“Kum ka jingsdang, ngi la rai ban sdang shwa na Shillong namar kadei ka pdengbah jong ki kam khaii drok. Ngin sa phiah pat ïa ka Shillong ha kiba bun ki zone bad hadien kane kan sa don pat ka jingbuddien ïa kaba man ka por, ka jingbuddien ïa ki nongdih drok, ki nongdie drok da ka jingtreilang bad ki tnad sorkar, ki dorbar shnong, ka tnad Social Welfare kynthup ïa ka tnad ka Koit ka Khiah,” u la ong.
U Myntri u la ong ruh ba ki kynhun balang kin sa kynduh biang pat ha ka 19tarik mynta u bnai ryngkat ki jingtyrwa kiba ki don ban ai sha ka sorkar.
Hadien kane, u ong ruh ba kin sa lum biang ïa ka jingialang sa bad ki Dorbar Shnong, ki sengbhalang bad kiwei kiwei.
Shwa kane, u la ong ba ki kynhun niam bapher bapher ki la don ka bynta kaba khraw bha ha ka jylla Meghalaya. “Lada ngi pyrshang ban ïalap paidbah halor ka jingkyrni dih drok bad kumno ba ki kmie ki kpa bad ki nongshong shnong ba don ka jingkitkhlieh, ngi dei ban sdang na la iing ban ïakhun pyrshah ïa u drok. Ki don ruh ka bynta kaba khraw ban pynwandur ïa ka lawei jong ka Meghalaya.”