Lum ka PYTIN ïa ki nongshong shnong ka thaiñ Thynroh ban pynsngewthuh ïa ka jingma u drok

Shillong, Naiwieng, 23: Ka Presbyterian Youth Today International Network (PYTIN) ryngkat ka jingïatreilang bad ka Seng Samla Shnong Thainthynroh, Hima Lyniong ha ka sngi Saitjaiñ ka la pynlong ïa ka Peace Rally ryngkat bad ka jingïathir nia halor ka jingktah jong u drok ïa ka jingim jong kiba la ngat ha u drok.
Ïa ka Peace Rally la pynlong ha ka surok jong ka shnong Thainthynroh bad la pynbud sa ka jingïathir nia ban ai jinghikai ïa ki nongshong shnong jong ka shnong.
Kum ban shu pynkynmaw hangne la seng ïa ka Presbyterian Youth Today International Network naduh ka por ba la tei ïa ka skul ha shnong Domïasiat, South West Khasi Hills kaba la pynduh da ka Sorkar na ka daw ka jingpyrshah ban tih Uranium.
Ha ka jingïathir nia ba la pynïaid da u Asst. Secretary ka PYTIN u samla Binchester Kharryngki la ïashim bynta ha ka jingïathir nia da u President ka Seng Samla Shnong Thaiñthynroh u Bah Samdorlang Rynjah.
U Bah Rynjah u la ong, ba u drok um pat ïoh rung ha kane ka shnong hynrei la ai ka jinghikai ïa ki samla bad ki nongshong shnong ba kin long kiba phikir bad sumar ïalade na u drok
Ka Kong Donborlang Kharryngki kaba mihkhmat na ka Seng Longkmie ka la ong, “ngi ïohsngew bad ïohi ha ki kotkhubor shaphang ka jingktah jong u drok ïa ki briew ha ki jaka sor wei ba u drok u la ïoh rung ha ka jingim ki briew kiba shah ktah ki pynjot ïa ki iing ki sem, ka imlang ka sahlang, wat ha ki iingmane ruh ki nongdih drok ki rung bad ki pynjot pynjakhlia kum ki nonglute bad ki nongtuh. Dei namar ka jingma ïa u drok, wat ha ki jaka nongkyndong ngi donkam ba ki bor shong bad ki longiing ba kin pyrshah ïa u drok katba ngim pat dier ka por.”
U Bah Sholi Kharryngki kum uwei na ki EC Member jong ka shnong, u la pynkynmaw, ba u drok u pynjot ïa ki iing ki sem bad ka imlang ka sahlang”.
La ïashim bynta lang ha kane ka jingïathir nia da u Bah Raphael Warjri uba la ong, “ba u drok u dei ka bih bad kum ki nongshong shnong ngi dei ban hikai ïa ki khun ki kti bad u drok u dei ka bih bad ngim dei ban bam ne ïalehkai bad ka bih.”
La pynkut ïa ka jingkren na u Bah Daniel Stone Lyngdoh u Advocate ka Sorkar Meghalaya ha Supreme Court bad uba long ruh u President jong ka PYTIN.
“U drok u dei ka jingpang bym lah ban pynkoit hynrei ka jingpang kaba la dep thikna ba ka dei ka jingpang jong ka jingïap. Ha ka jingim wei ba la ngat ha kane ka jingpang ym don shuh u plus ha ka jingim hynrei sa tang u minus, kaba mut tang ka jingjot suda. Kumta, ngin long kiba husiar na u drok,” u la ong.