Shillong, Lber 22 : Ka Department of Sanitation jong ka NEIGRIHMS ka la pynlong ïa ka ‘Hygeia 2025’ lane ka sienjam ban ïakhun na ka bynta ban wallam bad pynneh ïa ka khuid ka suba ha ki jaka ai jingsumar khnang ban ïoh ïa ka koit ka khiah ïa baroh.
Ha kane ka Swachhta Conference, la ïa kren bad syllok halor kiba bun ki ishu ban tehlakam ïa ka jingphriang ki khniang jingpang ha ki hospital, ka jingbud kyndon ïa ka jingkhuid ha ki jaka ba kongsan badkhamtam eh ha ki jaka puid ne ki operation theatere bad ruh ha ki Intensive Care Unit.
Ka Conference ka ïakren ruh halor kiba bun ki phang kiba ïadei na ka bynta ka jingïakhun pyrshah ïa ka jingkhia jingmut bad ka koit ka khiah ha ka bor pyrkhat jong baroh ki nongtrei jong katei ka shnat treikam.
Na ka liang ki nongtrei jong ka IHM Shillong bad ruh na ka State Pollution Control Board ki la wan ban pynshai shuh shuh ïa ki nongwan shim bynta halor ka phang kaba ïadei bad ka rukom bam kaba shngain bad ka jingbret pat ïa ki jaboh jabain ha ki jaka ba dei.
Haba kren ha ka jingïalang, ka Sr. Prof. Vandana Raphael ba dei ruh ka Director ba shipor jong ka NEIRGHIMS ka la ai ka jingïaroh ïa ka tnad kaba la pynlong ïa kum kitei ki jingïalang kiba lah pat ban wanrah ka jingmyntoi ïa kiba bun na ka bynta ban pynneh ïa ka jingkhuid ha ki jaka ai jingsumar.
Katba na ka liang u Prof. Suvamoy Chakraborty, Medical Superintendent u la ai ka jingpynshlur ïa ki nongtrei ka tnad ba kin pynnneh ïa katei ka jingleh khuid bad kyntu ruh ba ym dei ban ailad ban bret pathar ïa ki jaboh jabain sawdong.
Haba bynrap lang, u Bah David Umdor, Deputy Director (Admin) u la banjur halor kum kine ki sienjam bad pyntip ruh ba ka NEIGRIHMS ka la shim ïaki sienjam ban buh noh daki jaka pynkhuid um khnang ban kyntiew ïaka jingdon ka um kaba khuid ba suba bad ruh ban khanglad ïa ka jingdon ki khniang jingpang kiba lah ban phriang na ka um ha katei ka jaka sumar.
Ha kane ka jingïalang ki la don kumba 140 ngut ki nongwan shim bynta kiba kynthup ïa ki nongtrei na kylleng ki jaka sumar ba marjan bad ïoh ruh ïa ka lad ban ïatai bad ïa sam jingtip mar kylliang halor ka khuid ka suba.
Ka la don ruh ka jingïakob halor ka phang, ‘Best Out of Waste Competition’ bad ‘Quiz Competition’ ban pynshlur bad pynphriang shuh shuh ïa ka khubor sha baroh ki nongshim bynta. Ïa ka khusnam nongjop ha kane ka sngi la ïoh da ka Supercare Hospital, Mawiong CHC bad NEIGRIHMS ha ka kyrdan ba nyngkong, ba ar bad ba lai ha ka ‘Best out of Waste’ Competition. Katba ka Reid Provincial Chest Hospital, Ganesh Das Hospital bad ka Civil Hospital ki la ïoh pdiang ïa ka khusnam ba nyngkong, ba ar bad ba lai.
