Shillong, Lber, 09: Ryngkat lang bad ka pyrthei baroh kawei ka Meghalaya State Commission for Women (MSCW) ha ka sngi Thohdieng rakhe ïa ka International Womens Day da kaba pynkup burom ïa ki kynthei kiba la pawkhmat kum ki nongïalam bad ïa ki longkmie kiba la noh synñiang sha u sup u thiar sha ka imlang-sahlang.
Ha ka jingrakhe kaba la long ha Secretariat Wellness Centre, Additional Secretariat, Shillong la Padmashri Prof. Badaplin War ka long kum ka Kongsan ryngkat ka jingsakhi lang jong ka Chairperson ka Meghalaya State Commission for Women (MSCW) ka Kong Ïamonlang Syiem, ka Director jong ka Social Welfare, ka Kong CD Lyngwa nalor kiwei kiwei kiba la shah khot sngewbha.
Ka Prof. Badaplin haba kren ha kane ka sngi, ka la ong ba ka daw kaba la pynlong ïa ka Ri baroh shityllup ka pyrthei ban rakhe haka 8 tarik u Lber kum ka sngi kyrpang ïa ki kynthei ka dei halor ka jingtrei minot, ka jingtrei shitom bad ka jingïaishah jong ki ‘riew kynthei ïa ki jingeh kiba ka mad haka jingim.
“Ki kynthei ha ki por barim, ki mad shibun ki jingeh ha ki jingtrei-jingktah, ki longïing-longsem bad haka jingim kaba shimet jong ki, bad ha kane ka jingmad jong ki ïa ki jingeh haka jingim, ki la don napdeng jong ki kiba shim ïa kane ka sienjam ban mih shakhmat bad ban pynshai paidbah ïa ki jingeh kiba ki mad da kaba mih shakhmat ban pan ïa ka jingïada bad ban pyllait ïa ki naka jingñiew shiliang khmat,” ong ka Prof. Badaplin.
Ka Kong Ïamonlang Syiem haba kren ha ka jingïalang ka la pynpaw ïa ka jingsngewkmen kaba khraw halor ka jingdonkti jong ki ‘riew kynthei bad ki longkmie ban ai ïa ka jingshakri kaba radbah ha ki shnong-ki thaw.
Ka Director ka Social Welfare, Kong CD Lyngwa ka la ong ba kum ki ‘riewkynthei ki don ïa ka bor bad ka dor jong ka hynrei kum ki riewkynthei haba ki ïoh ïa ka jingkyrshan na ki rang khatar bor ki lah ban leh kham bha shuh shuh ïa ka kam kaba ki trei.
Ha kane ka sngi, la pynsngewthuh halor ka phang pdeng jong ka prokram da ka Kong Joy G. Syiem, ka jingpule ïa ka poitri da ka samla Fenie Vanecia Mawlong.
Shwa ban pynwai, la pynkup burom ïa ki riewkynthei kiba la trei borbah na ka bynta ka bha-ka miat ha ki shnong ki thaw ïa kaba la jied hi da ki Rangbah Shnong jong ki shnong bapher bapher.
