Lum ka KYM ïa ki paidbah ka sor Jowai bad ki shnong ba marjan ban ïada ïa ka Wah Myntdu

Jowai, Nailar 10: Ki paidbah nongshong shnong ka Jowai bad ki shnong ba marjan ryngkat bad ki kynhun bapher bapher, hynnin ka sngi 9 tarik u Nailar ki la wan sha ka jingïalang ba la pynlong ha Chilliang Raij Community Hall, Jowai ba la khot da Khooid Ya Ka Wah Myntdu (KYM), na ka bynta ban ïada bad wad ki lad ban pynneh pynsah ïa ka jingkhuid ka Wah Myntdu, ka wah kaba bsa ïa ka um bam um dih bad kumjuh ruh ban ai um ïa ka rep ka riang jong ki briew ha nongbah Jowai kumjuh ruh sha baroh kiba don lyngba kane ka wah.
U President ka KYM Bah K.L Pariat, ula ong ba ka jingthrang jong ka seng halor ka jingkhuid jong ka wah Myntdu mynta la kumba 5 tylli ki snem bad kaba dang ïaid lynti haduh mynta, ka seng ka la ïohi bad ïoh sngew ruh ïa ka jingud jong ki paidbah ha ka jingïadei bad ki jingshah ktah jong kane ka Wah Myntdu kumba long mynta.
Ha kane ka jingïalang, ka KYM ka kyntu jur ïa ki briew kiba don jaka ha ki rud jong kane ka wah ba kim dei ban leh jakhlia khnang ba ki briew kiba pyndonkam um na ka Wah myntdu kim ïoh ïa ka um dih um bam kaba bha lyngba kane ka wah, khamtam ruh ïa ka pateng ka ban dang wan kin ïoh ban pyndon ïa ka um kaba khuid ba suba. Shuh shuh u la ong ba ka KYM ka kyrpad ïa kiba dei peit ba kin shah ban shna ïing briew kaba jngai kumba 100 meters na ka wah, kaba long kawei na ki jingïada ïa ka jingkhuid jong ka wah.
U la ong ruh ba ka KYM ka la kyrpad ïa ka Sorkar lyngba u Myntri Rangbah ka jylla u Conrad K Sangma bad kumjuh ruh ïa u Dy. CEM u Bah Sniawbhalang Dhar ba kin pynbha bad ïada ïa ki rud jong ka Wah Myntdu, kaba dei tang kane ka wah kaba bsa um ïa shibun ki longiing.
Ha kane ka jingïalang la ai jingmut na u Bah Rupaia Lamar dkhot ka KYM, Bah Snar Laloo, Bah S.K Lato bad kiwei kiba kynthup naduh ki Waheh Shnong, General Secretary Synjuk Waheh Chnong Ri Jaiñtia, na ka Seiñ Raij Jowai, President, General Secretary ka Synjuk Waheh Chnong Jowai, ki seng Kynthei, Seng bhalang, ki dkhot jong ka seng ki nongkhwai dohkha bad kiwei de.
U President Bah K.L Pariat u la ong ruh ba hadien ka jingïalang ka ban long ha nongbah Delhi ha kane ka 22 traik mynta u bnai kan sa khot biang ïa ka jingïalang na ka bynta ban pynsngew ïa kaei ba ki wanrah na ka jingïalang ha katei ka Nongbah Delhi.