Lum jingïalang u Myntri ïa ki samla pule bad ki nongïalehkai hashwa ban leit Delhi

Jowai, Nohprah 08 : U myntri ka tnad ïalehkai Sports ka jylla u ma Wailadmiki Shylla mynta ka sngi ula pynlong ïaka jingïalang naka bynta ki samla pule bad ki nongïalehkai ba paw ka District ne ki ‘Outstanding Students & Star Performer’s kiba la shah jied hashwa ka jingleit jngoh ïaka President badon burom jong ka Ri India bad ban ïashim bynta lang haka Winter Session jong ka Parliament, 2025.
Ïa kane ka jingïakynduh lang la pynlong ha Conference Hall jong ka ophis u Deputy Commissioner, haka jingdonlang u Abhinav Kumar Singh, IAS, Deputy Commissioner, ka Sub-Divisional Officer (Sadar) Jowai ka Vevotolu Kezo, IAS, u Assistant Commissioner u ma F. Passah, MCS.
Na ka liang u ma Wailadmiki Shylla ula ïaroh ïa ka ophis u Deputy Commissioner kaba la pynlong ïa kane ka jingthmu kaba jop. Ula ai ruh ka jingïaroh ïa ka SDO (Sadar) Jowai bad ïa baroh ki nonghikai kiba la noh synñiang bad pynshlur ïa kitei ki samla pule bad ki nongïalehkai Sports ban wan sha kane ka sngi bad ban wad jingtip shuh shuh.
U Deputy Commissioner ka District u Abhinav Kumar Singh ula pynpaw ba ïa kane ka prokram la pyrkhreh lyngba ki jingïakren pynbeit bad u Myntri sorkar ma Wailad, kum shi bynta ban pynpaw pyrthei shuh shuh ïa ki sap ki phong jong kitei ki samla.
La pynsngew ruh ha kane ka jingleit (Exposure Trip) ban ïakynduh bad ka President badonburom jong ka ri India, kin leit jngoh ruh ïa ka Rashtrapati Bhavan, ïa ka Museum jong ka, ban sakhi ïaka jingïalang (live) jong ka Parliament bad ban jngoh ruh ïaka Nehru Planetarium.
Nalor kitei ki jaka lada dang ïoh lad yn ïalam ïa kitei ki samla pule bad ki rang ïalehkai sha kiwei pat ki jaka ha nongbah Delhi.
Baroh kitei ki samla kila don 17 ngut la synran lang ka samla Sawakani Lakiang (Nongjop ïa ka takma ksiar ha ka kyrdan Bikini Model bad ka kynthei ba marwei na Meghalaya kaba la jop ïa ka Procard Holder ha Mumbai kaba la pynlong da ka South Asian Association for Regional Cooperation) bad u Alexender Lyngdoh (nongjop haka National Arm Wrestling & Para Arm Wrestling Championship 2025) ha ryngkat u Iaidbha Phawa, Assistant Research Ophisar bad u bah Kynphammi Ryngkhlem, Research Assistant jong ka Planning Branch, DC, Ophis, Jowai ki ban ïalam lynti ïa ki ha baroh kawei ka prokram ryngkat ki jingdonkam baroh, kynthup ïa ka leit ka wan bad ka jaka sah la pynbeit da ki bor synshar District.
Kane ka kynhun kan mih mynta ka sngi 8 tarik bad kin wan phai biang haka 13 tarik u Nohprah, 2025.