Shillong, Risaw 08: U Myntri Rangbah ka jylla u Conrad K Sangma u la khot ïa ka jingïalang pynbeit kam bad ki bor pynïaid District jong ka South Garo Hills ha Dimapara ban khmih ba ki lad ai jingïarap kin poi bad kumjuh ruh u la leit peit ïa ki jaka kiba la julor na ka daw jong ka jingshlei um bad twa khyndew ha kane ka District.
La ong ba ki la don haduh 40 tylli ki shnong kiba la shah ktah ha ki 3 tylli ki block na ka daw jong ka jingpynjot pynjulor jong ka mariang bad kumba 2510 ngut ki nongshong shnong bad 462 tylli ki longïing ki la ngat ha kane ka jingjia. Kumba 7 ngut ki briew napoh kajuh ka ïing ki la shah tep im ha ka jingtwa ka khyndew kaba la tap ïa ka ïing jong ki ha ka shnong Atisia Songmong kaba hab hapoh Gasuapara.
Ha kane ka jingleit jngoh jong u, u la ban jur ban don ka jingsdang ïa ka khmih bniah halor ka jingshlei um khnang ban ïada na ka jingduh jong ki mynsiem briew bad ki jingdon jingem.
U la bthah ruh ïa ki heh ophisar ban sdang noh ïa ki kam maramot kham kloi bad ban pynthikna ïa baroh ki lad jingïarap sha ki nongshong shnong kiba la shah ktah.
Katkum ka kyrwoh khubor la ong ba na Dimapara, u Myntri Rangbah u la leit sha Atisia Songmong, bad u la ïaid kjat kumba 2 km ban poi sha ka jaka ba la jia kane ka jingjia ba sngewsih.
Ha kane ka jaka u la aiti ïa ka song pisa sha ki 5 ngut ki lanot na ki 7 ngut kiba na kajuh ka ïing ka sem u Watison Marak bad ïa ki arngut pat la aiti sha u Baseng Momin, uba la duh noh ïa la ka jong ka kurim bad u khun jong u.
U la shim bynta ha ka jingduwai sngewlem kaba la pynlong hapoh ka ïing ki lanot ha kane ka shnong bad u la sngap ruh ïa ki jingeh ba la pynpaw da ki paidbah. U la pynthikna ba ka sorkar kan pynthikna ban shna noh ïa ka surok bad ka jingpynbiang ïa ka bording kham kloi katba lah.
