Lum jingïalang u Bah Process ïa ki heh PHE bad DS Mawïong halor ka skhim um ba T.24 Klur

Shillong, Jylliew 01 : U Co Chairman ka Meghalaya State Development Reform Commission (SDRC) u bah Process T Sawkmie u la lum ïa ka jingïalang ïa ki Engineer ka tnad PHE, kumjuh ruh ïa ka excutive committee jong ka Dorbar Shnong Mawiong Umjapung hapoh ka jingïalam jong u Rangbah Shnong bah Herman Dohtdong ban ïakren halor ka skhim sam um kaba T.24 klur tam kaba u la pynïoh naduh ka por ba u long MLA ka Mawlai ha committee hall jong ka Secretariat, Shillong myn ha ka sngi Hatmajai ka 30 tarik u Jymmang.
“Nyngkong eh ha kane ka sngi ngi la ïakren shaphang ka jingkyrduh um ha Mawiong Umjapung namarba mynshem snem ka tnad PHE ka la dep mang T.24 klur tam na ka bynta ban pyntreikam ïa ka jingsam um hapoh Mawiong Umjapung,” ong u bah PT Sawkmie, uba dei ruh u MLA barim ka Mawlai haba kren sha ki nongthoh khubor hadien ba la wai ka jingïalang.
U la bynrap, “Kaei kaba nga sngewsih ka long ba khlem lah ban pyntreikam ïa kane ka 24 klur tam, kumta mynta ka sngi hadien ba la shimti kum u Co Chairman ka SDRC nga la lum ïa kane ka jingïalang ïa ka excutive committee jong ka Dorbar Shnong Mawiong Umjapung ryngkat ki heh engineer ka PHE ban ïapyrkhat ïa kane bad haba ïa phylliew jingmut la sngewthuh ba kane ka 24 klur hi ka dang don, kumta nga kwah ba na ka liang ka tnad PHE kan pyntreikam noh ïa ka, kumjuh ruh na ka liang ka Dorbar Shnong Mawiong Umjapung kan pyrkhat bha bad kin pdiang sngewbha ïa kane ka skhim khnang ban lah ban weng ïa ka jingeh ki paidbah.
“Kumba ka long mynta hi ki paidbah ka Mawiong Umjapung ki jynjar bha, namarba na ka por sha ka por ki pump ki la duh bad sniew, kumta na ka liang ka PHE department ka la mang ïa ka skhim kaba thymmai ban thied haduh saw tylli ki pump thymmai, te nga ngeit skhem hadien ba la pyntreikam ïa kane ka skhim, ngi don jngkyrmen ba ki pump kin ym pynthud shuh,” ong u Co Chairman.
U ong ruh, “Nga khmih lynti ynda la pyntreikam ïa kane ka skhim ki paidbah Mawiong Umjapung kin sa biang ïa ka umbam umdih.”
U pynpaw shuh shuh ba ha ka bynta kaba ar u la buddien ïa ki skhim Jal Jeevan Mission jong ki shnong Mawkynroh Umshing, Mawtawar, Umsaw Mawjynrong, Mawsiatkhnam, Umrynjah bad Umphrew.
U kyntu ruh ïa ka tnad PHE ba kan shimkhia lem ïa ka um sorkari, khnang ba ki paidbah kin ym mad jingeh.
Halor ka house connection ne jingring um ïing, u bah Sawkmie u ïathuh ba ka phase 3 ka dang ïaid shaid shaid bad u ngeit skhem ba shen kin sa ïoh ïa ka jngring um ïing kaba thymmai.
Ha kane ka jingïalang na ka liang ka PHE, la ïa don lang u Additional Chief Engineer, u bah R.S Nongbri, ki excutive engineer bad ki engineer na ka Greater Shillong Water Supply, ka Electrical bad kiwei ki division.