Shillong, Jylliew 13 : U MLA jongka South Shillong Constituency u bah Sanbor Shullai u la lum ïa ka jingïalang ba kyrpang ban ïa bishar bniah halor ka jingpyntreikam ïa ka skhim Smart City bad kumjh ruh ïa ka jingbuh ïa ki CCTV ha kylleng ka constituency.
ïa kane ka jingïalang u la lum ha ka 8 tarik mynta u bnai ha ophis treikam jongu ha ïing ha Kench’s Trace, Shillong. Ha kane ka jingïalang la ïadon lang u SP Traffic u D Aswaghosh IPS, Executive Engineer ka Shillong Municipal Board bah F.B Chyne, ki ophisar na ka Laban Police Station, Rilong Beat House bad ki nongkitkam jong ki Dorbar Shnong bapher bapher.
Ha kane ka jingïalang u bah Sanbor u la kyntu ïa ki ophisar jongka tnad pynïaid kali bad Municipal bad kumjuh ruh ïa ki Dorbar Shnong ba kin ïatrei lang ban peit ïa ka rukom pynïeng bad ïaid ki kali , ki jaka pynhiar bad kyntiew briew ha ki Dong bapher bapher khnang ba yn lait na ka jingdheng kali.
Na ka liang u MLA u la pyntip ruh sha ki Dorbar Shnong ba u la pynkhreh ban pynïeng 265 tylli ki Solar Street Light ha ki dong bapher bapher jongka Constitency. Halor kane ula kyntu ïa ki Dorbar Shnong bad ki ophisar ka Municipal ban ïatrei lang ban peit ha kino ki jaka kiba donkam eh ban buh ïa kine ki solar street light khnang ba ki riewsniew kin ym ïoh lad ban leh ïa ki kam sniew. U la kyntu ruh ïa ki bor pynïaid ka Municipal ban buh kloi ïa kine ki street light, ïa ki CCTV, ban peit ba ki nala ki dei ban tuid bha bad kumjuh ruh ban pynïaid shakhmat shaid shaid ïa ka smart city projek.
Ki nongmihkhmat na ki Dorbar Shnong bapher bapher ki la ai ka jingïaroh ïa u bah Sanbor MLA jongki uba la shim khia na ka por sha ka por ban peit ïa ka jingïaid beit ïaid rynti ka rukom pynïaid kali khnang ban ym shah ktah ki paidbah bad khamtam eh uba shim khia ban bud dien da lade ïa ki skhim pynroi pynpar hapoh ka constituency.
