Shillong, Ïaïong 12: Ka Assam Rifles ka la pynlong ïa ka Assam Rifles Ex-Servicemen Association (ARESA) Conclave ba nyngkong eh ha nongbah Shillong, Meghalaya ha ka 11 Ïaïong 2025 kaba long u mawmer ba kongsan ha ka jingpynkhlaiñ ïa ka jingïadei hapdeng ka kynhun shipai bad ki shipai ba la shongthait jong ka.
Ka jingïalang ka thmu ban pynbha ïa ka jingïatreilang, ban ïoh ïa ki jingai jingmut katkum ka jingïadei, ban kyntiew ïa ka jingkitkhlieh bad ka jingtreikam jong ka ARESA, da kaba buh jingmut nyngkong eh ïa ka bha ka miat jong ka AR ESM bad kiba haïing jong ki.
Ïa kane ka jingïalang la pynïaid da u Lt Gen Vikas Lakhera, AVSM, SM, Director General jong ka Assam Rifles, uba la ai burom ïa ki jingnoh synniang jong ki shipai barim bad pynpaw ïa ka bynta ba kongsan ba la leh da ki shipai barim jong ka Assam Rifles ha kaba pynneh pynsah ïa ka jinglong ba janai bad ka jingshngaiñ jong ka ri.
Ha ka jingkren ba kongsan jong u, u la ban jur ïa ka jingdonkam ban bteng ïa ka jingïatreilang bad ki sienjam na ka bynta ka bha ka miat jong ki shipai ba la shongthait. Ha kane ka jingïalang ki la ïakren ïa ki bynta kiba ïadei bad ki shipai ba la shongthait.
Ka jingpynphriang ïa ki jingtip, ban pynpaw ïa ki jingtip kiba ïadei bad ka mariang, ai ïa ki jingtip ba bniah shaphang ki jingmyntoi bad jingïarap kiba dang ai bad pyntip sha ki nongshim bynta shaphang ki mat & ki jingïakren jong ka Agenda 2024-25 jong ka AGBM.
Ki bynta jong ka seng & ka jingtreikam, ban pyni ïa ka seng kaba dang don, ka jingtreikam jong ka bad ban ïakren ïa ki lad ban kyntiew ïa ka jingpynpoi ïa ki kam bad ban pynïasoh bad ka AR ESM bad ki khun ki kti.
Ki jingeh ban wanrah bad ïakren ïa ki jingeh kiba don mynta bad ki lad ki lynti ban pynduna. Ki bynta bapher bapher, ban ïakren bad pyrkhat sani bha ïa ki mat bapher bapher, ban lum ïa ki jingmut bad pyntreikam katkum ka jingdonkam na ka bynta ka jingmyntoi jong ka AR ESM bad ki khun ki kti.
Haba ai jingkren ha katei ka jingïalang, u Director jong ka ARESA, u la ong, “Kane ka jingïalang ka long ka jingpynshisha ïa ka mynsiem bad jingaiti lut jong ngi. Ka long kaba ai mynsiem ban ïohi ba ki shipai jong ngi ki shah ithuh bad ïoh jingkyrshan ha kum kane ka rukom kaba don jingmut.”
Ka Assam Rifles ka ïai bteng ban burom ïa ka jingshakri jong ki shipai ba la shongthait jong ka bad ka khmih lynti ban pynlong ïa ki jingïalang ki ban wan ha kylleng ki bynta jong ka ri ban pynthikna ka jingpynpoi bad jingkynthup lang ïa baroh.
