Jowai, Rymphang 18: Ka District Development Coordination & Monitoring Committee (DISHA) mynta ka sngi kala lum ïa ka jingïalang ha Conference Hall jong ka ophis Divisional Soil and Conservation, Jowai, ïa kane ka jingïalang la pynïaid da u Dr. Ricky A.J Syngkon u MP ka Shillong.
Ha kane ka sngi la don haduh 22 tylli ki tnad sorkar kiba don bynta ban pyntrei ïa ki skhim ba la bei tyngka na ka sorkar pdeng kila wan ban ïashim bynta lang.
Haba ai jingkren ha kane ka jingïalang, u MP Dr. Ricky A.J Syngkon ula ban jur ïa ka jingdonkam ban pynlong ïaka jingïalang DISHA la kumno kumno ar sien haka shisnem, khnang ban pynkhlaiñ ïa ka jingïatreilang hapdeng ki tnad sorkar. U kyntu ïa baroh ki tnad sorkar ban pynleit jingmut ban pyntreikam bha ïa ki skhim jong ka sorkar pdeng bad ban pynthymmai ïa ki man ka por.
Shuh shuh u kyrpad ban pynpaw ïa ki jingjop jong ki da kaba nujor ïa ki snem ba la dep bad ki jingkheiñ ba mynta u snem bad ban batai ïa ka daw ki jingkylla. Ula ban jur ba ym dei ban shu pule da kaba pyrta jam ïa ki slide, hynrei ha ka jaka kata ki dei ban pyntreikam ïa ki skim da kaba don jingmut bad kaba shai.
Na ka liang u Dr. Syngkon ula pynsngew ba ki jingïakren mynta ka sngi ki long kiba kongsan bha bad la pyntikna ba ki skim kin long kiba pynïoh jingmyntoi beit beit sha ki briew jong ka District.
Ki ophisar na ki tnad bapher bapher, kynthup na ka tnad ka koit ka khiah, PHE, ICDS, District Social Welfare Officer, District Child Protection Officer, District Rural Development Agency, District Commerce and Industries Centres, District School Education Officer, PWD (Roads), Water Resource, Tourism, Agriculture, Horticulture, Supply, Fisheries, Labour, Soil & Water Conservation, Animal Husbandry & Veterinary, Sports, Transport, MNREDA bad ka Municipal Board kila wanrah ïa ki reports treikam kiba la dep pyntrei bad kumjuh ïa ki skim kiba dang wan.
Na ka liang u Deputy Commisioner ka WJHD u Abhinav Kumar Singh, IAS ula ai ka jingkren pdiang burom ïa baroh kiba wan ïashim bynta, katba Project Director DRDA kong B. Blah (MCS) kala ai ki kyntien pdiang sngewbha bad ka jingbatai halor kane ka phang.
