Shillong, Ïaïong 28: Ka Committee on Welfare of Scheduled Tribes, Scheduled Castes, and Other Backward Classes jong ka Meghalaya Legislative Assembly, hapoh ka jinglong Chairman jong u Bah Lahkmen Rymbui, MLA (Amlarem) bad u Chairman jong ka Committee, ki la pynlong ïa ka jingïalang bad ka Sister Committee na Kerala Legislative Assembly ha kaba ïa kane ka jingïalang la pynlong ha Annexe Hall, Rilbong, Shillong, ha ka sngi Nyngkong mynta u bnai.
Ïa kane ka jingïalang la pynïaid da u Bah Lahkmen Rymbui bad ba la ïa shim bynta da ki dkhot ka Meghalaya Committee, ba kynthup ïa u Rupa M. Marak (MLA, Dadenggre) bad u Bah Gabriel Wahlang (MLA, Nongstoiñ). Ha kane ka jingïalang la donlang ruh ki ophisar na ka Meghalaya Legislative Assembly Secretariat ba kynthup ïa u Malthus S. Sangma, Secretary; u Bah R. Nongsteng, Under Secretary bad ka Kong L. Mynsong, Committee Officer.
Na ka liang ki nongmihkhmat napoh Kerala la ïalam da u Acting Chairman u A. Prabhakaran bad kaba kynthup ïa ki dkhot kum u Kurukkoli Moideen (MLA, Tirur), u K. K. Ramachandran (MLA, Puthukkad), u G. Stephen (MLA, Aruvikkara), u T. J. Vinod (MLA, Ernakulam), bad u K. Babu (MLA, Thripunithura).
Ki ophisar kiba la wan ban synran lang ïa ki nongmihkhmat na Kerala ki kynthup ïa u Nanda Kumar R, Under Secretary, u Anil Kumar G. K., Assistant Section Officer, u Sandhya S. Nair, Assembly Attendant, bad ka Asha Karunakaran, Reporter Grade-I, napoh ka Kerala Legislative Assembly Secretariat.
Kane ka jingïalang ka la pynleit jingmut ban ïasyllok halor ki kam jong ka bha ka miat, ka jinglah ban leh bha bad ki lad na ka bynta ki jingïatreilang hapdeng kine ki artylli ki jylla bad ki Ïing Thaw Aiñ haba ïadei bad ki jaka jong ka roi ka san jong ki Scheduled Tribe, Scheduled Caste, bad ki Other Backward Classes.
