Shillong, Ïaiong 12 : Ka sienjam ban ïarap ïa ki nongshong shnong ka Jowai kiba shah ktah jur ha ka jinglang thup ki jaboh ha kylleng ki bynta jong ka nongbah, ka High Court ha ka sngi Ba-ar ka la bthah ïa ka Jowai Municipal Board (JMB) bad ruh ïa ka Jaintia Hills Autonomous District Council (JHADC) ban leit lum ïa kitei ki jaboh ba shu lang bad ban leit bret katkum ki kyndon.
Katei ka hukum ba pynmih da ka High Court ka dei halor ka Public Interest Litigation No 6/2022, ba ujor da ka Synjuk Ki Waheh Shnong Jowai pyrshah ïa ka sorkar Meghalaya, JHADC, JMB bad Urban Affairs Department ha ka 07tarik u Ïaiong.
Katkum ka hukum, ka Synjuk ki Waheh Shnong Jowai ki la ujor ba ki jaboh jabaiñ kiba mih na ki iing ki sem bad kiwei kiwei ki jakhlia kiba lang thup ha Jowai ym shym la lum shuh na sor Jowai naduh ka 04tarik u Rymphang.
La pyni ruh ïa kitei ki dur jong kitei ki jaboh ba lum thup kylleng ki bynta jong ka sor Jowai ha katei ka sngi bishar ha kaba ka Court ka ong ong ba kitei ki dur ki pyni ïa ka jinglong jingman ka bym itynnad shuh. Ka kyntu ruh ba dei ban lum tikna noh ïa kitei ki jaboh bad ruh ban leit bret ha ka rukom kaba dei. La buh ruh ba ka sngi ban bishar biang kan dei ha ka 20tarik u Ïaiong.
Ha katei ka jingujor, ka Synjuk ka pyntip ruh ba na ka daw ka jingbym lah jong ka JJMB ban ai ka jingshakri, ki paidbah ki la leit ban lum thup ïa kitei ki jaboh ha pyrshah ka ophis u Deputy Commissioner’s Office, Thomas Jones College, Ïawmusiang market, Iew Thymme ha Ladthalaboh.
Ka jinglum thup ïa kitei ki jaboh ha kitei ki jaka kaba dei ruh harud surok bad ruh hajan ka College, ophis treikam bad ka iew ka la ktah haduh katta katta ïa ka koit ka khiah bad ka sawdong sawkun khamtam ïa ki paidbah kiba hap ban ïaid lyngba katei ka jaka ban leit thied jingthied na ka iew kaba don hajan bad ruh kiba leit sha ki ophis lane sha ki college.
