Nongstoiñ, Jylliew 12: Ka shnong Umwali kaba dei kawei na ki shnong kaba don ha ki thaiñ Langpih bad kaba dang hap hapoh ka West Khasi Hills District, ha ka sngi saitjaiñ ka la shong ïa ka dorbar kaba kyrpang na ka bynta ban pynpaw ïa ka jingbynñiaw, namar ka jingpynbudnam jong ka kong Kwiskelda Lyngdoh Marshillong da kaba kynnoh pyrshah ïa u bah Teibor Nonglang ba u la leit ban byrngem byrsit ha ka ïing jong ka. Ïa katei ka kam la ong ba katei ka longkmie ka la thad lyngba ki lad pathai khubor khlem da ïakren pynbeit ïa ka kam shnong kam thaw.
Ha katei ka dorbar kaba kyrpang la ïadonlang naduh ki longkmie, longkpa, ki khun samla ban ïatai sani haba ïadei bad ka jingleh jong katei ka longkmie, kaba la tip kum ka Kwiskelda bad ka dorbar ha katei ka jingïalang hadien ba ki la ïoh bad ïakren sani bha ki la shim ïa ka rai ban pynrem ïa ka jingleh bym suidñiew jong katei ka longkmie.
U bah Teibor Nonglang sordar ka shnong Umwali, u la ong ba ma u kum u nongsynshar shnong u la leit ban tem ïa ka jingïakajia kaba la ïa tyngkhuh hadpeng katei ka longkmie pyrshah ïa ki khun samla, hynrei katei ka longkmie ka la pynbudnam khlem nongrim.
U samla Franklin Lyngkhoi President VDP u la ong ba kane kam dei ka jingjia kaba dang jia, hynrei ha katei ka shnong ki don tang ar ïing kiba ju ïaleh pyrshah man ka por ïa ki bor shnong. Ki ju pyni bor ruh wat ïa ki VDP bad kita ki ar ïing ki dei jong ka kong Kwiskelda Lyngdoh Marshillong bad ka kong Sngewbhalin Paliar.
Na ka liang jong ka kong Kiarlinda Lyngkhoi kaba dei kawei na ki longkmie, ka la pynrem jur ïa kaei kaba la jia ha kaba kum ki longkmie ki lah dei ban ïa sylla lem, khnang ban pynwandur haba ka dei tang ka kam ïing kam sem, ong katei ka longkmie.
U bah Diswelning Sangleiñ Secretary ka shnong Umwali pat u la ong kum ki nongsynshar shnong, ki lah ban leit ha ïing jongno jongno ruh lada ka dei ïa ki bad leit la ha ka miet ka iong, namar ka dei ka kamram jong ki hynrei ban kynnoh ba la leit ban byrnem byrsit ka dei kaba shu lamler.
Ym tang katta hynrei u la ong ruh ba ha ka ïing jong ka kong Kwiskelda Lyngdoh Marshillong, ym ju don ba nud ban leit wat tang ha phyllaw ruh, namar ki khynnah haba ki kum pynpoi bakla ïa ki tiar jingïalehkai jong ki ha phyllaw jong ka, kim ju nud shuh ban leit shim biang.
Lah ban kdew hangne ba katei ka shnong ka dei ka shnong kadei kaba don ha khappud bad ka jylla Assam, kaba ju shah pyndik man ka por ha ki pulit Assam. Hynrei, mynta ka kynti pat hadien ba la sdang kynjah ka jingïakynad bad ki Assam la sdang pat sa para Khasi.
