Long kiba leh khuid ban ïada ïa ka jingïap ki khunlung na ka pynhiar kpoh: DM&HO EJH
Khliehriat, Naitung, 03: Da kaba buh hakhmat ïa ka jingthmu ban pynduna ïa ka jingïap ki khunlung na ka daw ka jingpang pynhiar kpoh ka tnat ka Koit ka Khiah lyngba ka ophis District Medical & Health Officer (DM&HO) East Jaiñtia Hills District, ha ka sngi Balang ka la pynlong ïa ka Diarrhoea Campaign 2025 ha Rymbai PHC East Jaiñtia Hills District halor ka phang, ‘Ban ïada na ka jingpang pynhiar, sumar bha ïalade, pyndonkam da u ORS bad ban lehkhuid.”
U District Medical & Health Officer Dr D. Shylla haba kren ha ka jingai jingpynshai u la ong ba kane ka prokram ka don ka thong ban shimkhia ban ïada ïa ki briew bad ban ai ka jingsumar halor ka jingpang pynhiar kaba ktah ïa ki khunlung kiba hapoh san snem ka rta.
U la batai ruh halor ka jingdonkam ban dih ïa u ORS bad Zinc ki ban ïarap bad ai bor ban tei ïa ka met ban ïakhun pyrshah ïa ka jingpang. U la ong ba ka jingai buiñ na ka kmie ka long kaba donkam bha ïa ki khunlung kiba hapoh hynriew bnai.
U Dr Shylla u la ong ba ka jingpang pynhiar ka long kaba lah ban ai jingïada bad ka long kaba donkam ban pynmlien ban lehkhuid ha ïing ha sem, ban dih da ka um kaba la dep shet pynthnam, ban bam ïa ki jingbam kiba tei ïa ka met bad kiwei kiwei kiba donkam na ka bynta ka koit ka khiah.
Ka Health Educator jong ka Rymbai PHC Kong D. Kshiar ka la pynshai halor ka jingpang pynhiar, ki dak ki shin kiba paw shabar bad ka la ban jur ruh ba donkam ban pynmlien ban lehkhuid ha ïing ha sem bad ka jinglehkhuid ka dei kawei na ki lad ban ïada na ka jingpang pynhiar.
Ka la pyni dalade hi ïa ka rukom ban sait bha bad sait khuid bha ïa ki kti bad ka la kyntu ïa ki paidbah khamtam ïa ki ASHA ba ki dei ban pynsaphriang jingtip sha ki shnong ki thaw bad ruh ban hikai ïa ki nongshongshnong halor ka jingdonkam ban lehkhuid.
Ha kane ka prokram la donlang u Medical Officer in-charge ka Rymbai PHC Dr L. Kharnaior, u District Programme Manager (DPM), National Health Mission (NHM), East Jaiñtia Hills District Bah A. Dhar, u Block Programme Manager (BPM) Khliehriat National Health Mission (NHM), East Jaiñtia Hills District u Bah Lastone Bamon, ki ASHA bda bad ki nongshong shnong jong ka shnong Rymbai.