Long kiba husiar ha ka thied ka pet ïa ki mar ki mata na ïew na hat : DC SWKH

Mawkyrwat, Lber 22: Ka Deputy Commissioner, South West Khasi Hills District, kong C. Kharkongor, IAS ha ka jingkren jong ka ha ka sngi ban rakhe kynmaw burom ïa ka sngi kyrpang ki nongthied nongpet ne ka Inter National Consumer Day ka la pynkynmaw na ka bynta ki paidbah ba long borabor kiba husiar ha ka thied ka pet ïa ki mar ki mata jong ki na ki ïew ki hat nyngkong eh dei ban peit ïa ki tarik ba shna bad ki tarik ba kut jong ki mar khamtam eh ki kynja dawai, ki jingbam bad kumjuh ruh ka um dih khnang ban lait na kino kino ki jingeh.
Haba bynrap ïa ka jingkren, ka kong Kharkongor, IAS ka la pynkynmaw ba ïa kane ka Inter National Consumer Day ymdei ba la rakhe tang hangne hapoh ka Jylla ne ka Ri India jong ngi hynrei la rakhe ha baroh kawei ki ri ha ka pyrthei. La sdang ïa kane ka jingrakhe naduh u snem 1960 ha kaba ka don ka International Organisation Consumer Unit bad ba la ju rakhe man ka 15 tarik bnai Lber jong manla u snem.
Ha kajuh ka por ka la pynshai ruh ba balei la jied ïa kane ka 15 tarik u Lber kum ka sngi ba kyrpang jong ki nongthied nongpet ka long ba na ka liang u President ba 35 jong ka Ri America, u Kennedy ha kaba une u ïeng na bynta ka hok jong ki briew (khamtam eh ki dohïong ne Black People), u ïeng na ka bynta ka jinglaitluid bad ka hok jong ki.
Ka la pynkynmaw ruh ba ha kane ka sngi u Kennedy u ai ka jingkren hapoh ka Parliament ban pyntip ha ki briew ba kin long husiar bad phikir na ka bynta ban ïoh ki hok jingïada na ka bynta ki nongthied nongpet. “Ki saw tylli ki hok kawei ka dei ka hok ban ïoh ka jingïada, ka hok ban ïoh jingtip, ka hok ban ïoh jied bad ka hok ban ïoh sngew ne ki jingujor ha kaba ïa dei bad ki mar ki mata”, la ïathuh ka DC.
Namarkata, ka la pynkynmaw ba ka hok jong ki nongthied nongpet kam dei eh tang ha kaba thied tiar hynrei ka thew ha kino kino kam ba kumba ki la siew da ka pisa bad ma ki ki don ka hok ban ujor lada don ki jingbakla kum ha ki jaka sumar lada kim ïoh ka jingsumar ba paka, ha ki skul lada kim ïoh ki jinghikai ba bniah bad kiwei kiwei de ki bynta ruh.
Ha kane ka jingrakhe, ka kong C. Kharkongor, IAS ka la krern ruh khyndiat shaphang ka jingujor jong ki paidbah ha kaba ïa dei bad u khaw ba la suba ba dei u khaw plastik, hynrei ka la jubab ba em kam dei kumta hynrei katkum ka jingïathuh lyngba ka jingïakynduh ïa ka Assistant Commissioner jong ka Food and Safety, ka kong Mukhim kaba la wan ban ïa kynduh markhmat ha ophis jong ka Deputy Commissioner, South West Khasi Hills District ka la pynshai ba um dei u khaw plastik hynrei u dei u khaw ‘fortified rice’ uba la khlem ki kynja vitamin ka ban long ka jingïarap na ka bynta ki nongbam namar la khleh lang ka iron, ka B12 bad kiwei kiwei de.
Kiwei pat kiba la ai jingpynshai ki long u bah P.K. Snaitang, Superintendent Supply (SS) Nongstoiñ, uba la kren halor ka phang, “Ka Hok ki Nongthied Nongpet” bad u bah F.B. Khongnoh, Sub-Inspector (SI) Supply, South West Khasi Hills District u ba la kren bad batai ïa ka jingmut jong ka ePOS, NFSA bad BIS.
Ïa ka jingïalang ba pynïaid da u President ka Seng Samla Shnong Mawkyrwat, u bah Kitborsing Lyngdoh bad ka jingkren khublei na u General Secretary, Seng Samla Shnong Mawkyrwat, u Dawningstar Marweiñ.