Long katba long ka HYC kan bteng ban ïakhun pyrshah ïa u drok bad ka kam bamsap: President HYC

Shillong, Naitung 17: U Bah Roy Kupar Synrem President ka seng Hynñiewtrep Youths Council (HYC) Seng Kmie u la ong ba ka seng kan ym shongthait hynrei kan ïai bteng beit ban ïakhun pyrshah ïa u drok bad ïa ka bamsap bampong hapoh ka Jylla.
“Kawei kaba ngi la ïeng skhem, long katba long ka jingïakhun pyrshah drok ka HYC kan dang rhem bad kan dang ïai bteng ha ki sngi bad ki por kiban dang wan. Ka kam bamsap bampong kadei sa kawei ka mat ba ka seng HYC kan ïakhun doh ïap ban pynduh jait ha kane ka ri kaba ieid eh jong ngi,” ong u Bah Roy Kupar Synrem.
U Bah Roy Kupar Synrem haba ai jingkren ha ka sngi rakhe dap 10 snem ka seng ha ka sngi Balang ka 17 tarik Naitung 2024 ha Lariti Centre, Mawdiangdiang, New Shillong kaba dei ruh ka lyngkhuh sngi ïap ba 189 snem u Pa’iem Tirot Sing Syiem, u la ong ba la seng ïa ka HYC ha u snem 2014 halor ka nongrim ban ïada ban pynneh pynsah bad ban kyntiew shuh shuh ïa ka sap ba kyrpang jong ka bri u Hyñniewtrep.
U President ka seng u la bynrap da kaba ong, “Kawei na ki mat ba ka seng ka la ju ïeng naduh ba la seng ïa ka, kadei ka Inner Line Permit (ILP) kaba dei ka mat bahakhmat duh jong ka jingdawa ka seng, hynrei sngewsih ba ka sorkar jylla kam shym la shimkhia halor kane, kum ka seng ka dang ïai dawa ïa ka ILP namar kadei ka stieh jingïada na ka jingwan buhai shnong ki poiwir hapoh ka jylla”.
“Ka don ka kyntien kaba ong, ba ka ktien ka long u dak ban pynïapher ïa ka jinglong kyrpang ka Jaidbynriew bad kumta ka seng ka dawa ban pynrung ïa ka ktien Khasi ha ka khyrnit kaba phra jong ka riti synshar ka ri India ka long sa kawei pat ka mat ba ka seng ka la dawa na ka por sha ka por bad halor kane ka mat ka seng kan sa nang ïai buddien,” la ong u Bah Roy Kupar.
La pynphuh pynphieng ïa ka prokram ha kane ka sngi da ki jingrwai na ki kaitor ba paw ka jylla, ki jingshad tynrai. Ka seng ka la pynkup burom ruh ïa ki samla kiba wan shakhmat ha ki eksamin bapher bapher mynta u snem kynthup naduh ka SSLC, HSSLC, CBSE bad ICSE. La pyllait ruh ïa ka thup jingrwai ba ar jong ka seng kaba la jer kyrteng ‘Hei Ho’, ka jingpyllait paidbah ïa ka thup sah kynmaw jingdap 10 snem bad ka jingot ïa u cake.
Ha kane ka jingrakhe ïa ka lyngkhuh dap 10 snem la ïadon ryngkat ki nongkitkam ba hakhmat eh jong ka seng naduh u President Bah Roykupar Synrem, General Secretary Bah Rhembor Saiborn, ki Vice President Bah Donboklang Kharlyngdoh bad u Bah Francis Gee Mawlong, Secretary Bah Isaac Basawïamoit, kumjuh ruh la ïadonlang u President barim ka seng u Bah Robertjune Kharjahrin, u MDC ka Mawkynrew Bah Martle N Mukhim, Pastor Nathan Diengdoh nalor kiwei kiwei ki riew Rangbah, ki longkmie longkpa, ki samla shynrang bad kynthei bad kiba la shah khot sngewbha.