Shillong Nailar 01: Kan long kaei kaei kaba phylla ban shem ba ka jylla Meghalaya ka la dei ka jylla kaba bun tam kiba khlem kam khlem jam napdeng baroh ki jylla kane ka thaiñ shatei lammihngi bad ka la tam ruh ïa ka jingdon ki bym ïohkam ïohjam ha ka ri ne ka national unemployment rate ha kaba kane ka long lyngba ka kaiphod jong ka Periodic Labour Force Survey (PLFS).
La ong ba ïa kane ka jingkheiñ haba ïadei bad ka jingdon ki jylla ha ka ri kiba bun tam kiba khlem kam khlem jam la ïathuh da u Myntri Khynnah ka sorkar Pdeng uba khmih ïa ka tnat Labour & Employment, u Shobha Karandlaje ha ka jingjubab lyngba ka jingthoh hapoh Lok Sabha.
Ka khubor ka ïathuh ruh ba katkum ka Periodic Labour Force Survey (PLFS) 2022-23, ka Meghalaya unemployment rate ka long 6.0 per cent. Ka kaiphod ka PLFS ka dei ka jingjurip jong ka jingdon ki samla kiba la don ha ka rta kaba 15 snem shaneng.
Ka jingdon kiba khlem kam khlem jam ha ki thaiñ sor ha ka jylla ka long 12.3 per cent kaba long kaba heh bha ban ïa ka national average rate kaba dei 5.4 per cent.
La ïathuh ba ka jylla Arunachal Pradesh pat ka la wan baar ka jingdon ki briew kiba khlem kam khlem jam ha kaba ka poi 4.8 per cent ba la pynbud pat da ka jylla Manipur (4.7 per cent) bad ka jylla Nagaland (4.3 per cent).
Ki jylla kane ka thaiñ shatei lammihngi kiba don duna kiba khlem kam khlem jam bad kiba bun kiba la ïohkam kidei ka Mizoram (2.2 per cent), Sikkim (2.2 per cent) bad Assam (1.7).
Haba peit ïa ka All India Unemployment Rate kaba long 3.2 per cent kane ka pyni ba ka jylla Meghalaya ka don ka jingkheiñ kaba heh tam ka jingdon ki briew kiba khlem kam khlem jam ban ïa kiwei pat ki jylla ha ka ri.
Shuh shuh haba phai sha ka ri baroh kawei ka jylla kaba bun tam kiba khlem kam khlem jam kadei ka jylla Goa kaba la kot sha ka 9.7 per cent ba la pynbud pat sa ka jylla Kerala da 7.0 per cent.
Ki Union Territory kiba bun tam kiba khlem kam khlem jam kadei ka Lakshadweep kaba la poi 11.1 per cent.
Ka jingkheiñ jong ka jingdon kiba ïohkam bad kiba khlem kam khlem jam la lum lyngba ka Periodic Labour Force Survey (PLFS) ba la pynlong da ka Ministry of Statistics and Programme Implementation naduh ka snem 2017-18. Kane ka jingjurip kadei ka por kaba la sdang naduh u bnai Naitung haduh u bnai Jylliew jong manla u snem ha kaba kane ka ïaibteng ruh manla ka por ban ïoh lum ïa ki jingkheiñ jong ka jingdon ki briew kiba la ïohkam bad kiba khlem kam.
