Long borabor ki samla kiba kiar na ki kam sniew bad long ka nuksa ba bha ïa kiwei: A.L Hek

Mawkyrwat, ‘Nailur 14: Ka SSKNPMSU ne ka Synjuk Samla Katholik Nativity Parish Mawkyrwat Shillong Unit ka la pynlong ïa ka jingïakynduhlang jong ki samla jong ka Balang kaba ki khot ka 5th Annual Youth Freshers’ Meet ha Sacred Heart Theological College, Mawlai ha kaba ki la buh ruh ka phang pdeng kaba ong, “To Kyrmen da ka jingkmen, to ïaishah ha ka jingjynjar, to minot ban duwai”.
Ha kane ka prokram, u Bah A.L. Hek, Myntri jong ka tnat Animal Husbandry bad Fisheries jong ka Sorkar Jylla u la long kum u Kongsan bad u Babu Denis Nongsiej, District School Education Officer (DSEO) jong ka South West Khasi Hills District kum u symbud kongsan ha ryngkat ka jingïadonlang ki Sister, ki Longkmie Longkpa bad ki nongïalam jong ka Synjuk kiba wan na ka Mawkyrwat Parish.
U Samla Welbokstar Lyngkhoi, uba bat kum u President ka Synjuk Samla Katholik Nativity Parish Mawkyrwat, Shillong Unit ha ka jingkren jong u la ai ruh ïa ka kaiphod treikam jong ka Unit ha kane ka samoi treikam bad kynthup ruh ïa ki kam kiba ka Synjuk ka la trei na ka bynta ki samla, ka Balang bad ki shnong kiba don hapoh ka Parish Mawkyrwat.
U Bah A.L Hek haba ai jingkren ha kane ka sngi kum u kongsan ula ai jingkyntu ïa ki samla ba kin trei shitom ha ki kam bad ki jingpule ba ki ki la jied. Ym tang kata u la bynrap ruh da kaba ong, “Kum ki samla, shibun ki jingeh phin ïa kynduh—la ka dei ha ki kam, ki jingpule ne ha ka jingim mynsiem,”.
Shuh shuh ula bynrap ruh da kaba ong, “U Kpa Bakhuid u la pynbna ba ka snem 2025 ka dei ka snem jong ka Jingkyrmen Im Sngi. Dei ki samla kiba dei ban long ki nongmihkhmat jong ka jingkyrmen, ym tang na ka bynta lade hynrei na ka bynta kiwei ruh.”
Haba kyntu ïa ki samla, u Bah Hek u la ong ba ai ba ki samla jong ka Parish Mawkyrwat kin ïai long kiba nangtrei shitom na ka bynta ka Balang bad ruh na ka bynta ka jingpynbha ïa ka imlang ka sahlang da kaba kin long ki samla kynthei bad shynrang kiba kiar na ki kam sniew kum ka jingdih buaid kum u drok bad kiwei, bad long ka nuksa na ka bynta kiwei ha ka lynti kaba bha ïa kiwei de.
Khma hashwa, ïa kane ka sngi la sdang da ka Mass Bakhuid kaba la pynbynta da u Fr. Cosmos Jyrwa, ha ryngkat ka jingsynranlang jong u Fr. Donbor Jyrwa bad u Spiritual Director ka Synjuk Samla Katholik Nativity Parish Mawkyrwat Shillong Unit, u Fr. Aiborlang Nongsiej ryngkat ka jingïashimbynta jong ki samla naduh ka Mass Bakhuid bad bud sa ka program kyrpang kaba kynthup ïa ka Mr & Miss Freshers Contest bad ka jingpynkup burom ïa ki samla kiba la pas bha ha ki eksamin bapher bapher.
Kiwei de ki prokram ha kane ka sngi ki long ka jingkren na ka Sister Lona Mary Jyrwa, na u Fr. Aiborlang Nongsiej, bad na u President ka Synjuk Samla Katholik Nativity Parish Mawkyrwat, u Samla Gilbert Syiemlieh.